Menu principal

Menu principal

Awal ɣef uselmed n tmaziɣt gar uneɣlaf n usegmi d umaru amatu n Useqqamu Unnig i Timmuzɣa

Yeffeɣ-d ass n : Akras, 18 Meɣres 2020 14:46   Ɣran-t : 9 n tikkal
Awal ɣef uselmed n tmaziɣt gar uneɣlaf n usegmi d umaru amatu n Useqqamu Unnig i Timmuzɣa

LEZZAYER TAMANEƔT – Deg umyager ay d-yellan gar uneɣlaf n usegmi, Mohamed Ouadjaout, d umaru amatu n Useqqamu Unnig i Timmuzɣa, Si El-Hachemi Assad, yella-d wawal ɣef usduqqes n tesmilt tuxliḍt gar uɣlif d useqqamu i lmend  uselmed n tmaziɣt d tegnit n uselmed n tutlayt tamaziɣt, ɣef wakken ay d-yenna yiwen n ulɣu n Useqqamu Unnig i Timmuzɣa.

Mass Ouadjaout yemmuger yiwet n tmagla n Useqqamu Unnig i Timmuzɣa ay d-yusan ddaw tmehla n Mass Assad i lmend n « usduqqes n tesmilt tuxliḍt gar snat-a n tsuda d udiwenni ɣef wakaten ulmisen yeqqnen ɣer tegnit n uselmed n tutlayt tamaziɣt s wakk tisenfal-nnes, aselhu n uselmed-a s unmireg gar uɣlif n useqqamu s uḍfar n uɣawas aɣelnaw ayɣef ara d-yili umsegzu yernu d win ara yeddun d uɣawas n unabaḍ ay yettwasmemmin seg melmi kan », ɣef wakken ay d-yerna ulɣu-a.

Deg umyager-a amezwaru, ay d-yellan ass n uynas, yella-d udiwenni ɣef « wakk udmawen yerzan aselmed n tmaziɣt seg wasmi ay tudef ɣer unagraw asegman deg 1995 ».

Mass Assad iga-d tasemlilt ɣef umhaz n uselmed n tutlayt tamaziɣt, d tin aydeg ay d-yebder « uguren ideblanen d wuguren yeqqnen ɣer lbal ay icewwlen tiddit yelhan n uselmed n tmaziɣt, ladɣa deg twilayin wuɣur yudef uselmed n tutlayt-a seg melmi kan, yernu iger-d tiɣri i usduqqes n tesmilt-a tuxliḍt d uheyyi n ukatar iwatan i uḍfar yelhan ugar n uselmed n tmaziɣt d uferru yelhan ugar i wuguren yeqqnen ɣer waya », ɣef wakken ay d-yerna uɣbalu-a.

Aneɣlaf, yenna-d dakken yeqbel, deg umenzay, ayen ay d-yettwassumren, deg ukatar n tlisa timenḍawanin n tzemmar-nnes, ladɣa deg wayen yerzan abdad asensegman i tutlayt tamaziɣt s wakk tintaliwin-nnes, ladɣa imi aselmed n tutlayt-a taɣelnawt d tunṣibt mazal yesɛa uguren yeqqnen ɣer useqɛed, aselmed d usnegmu.

Mass Ouadjaout iwekked-d dakken « yettḍafar ahil n unabaḍ deg ukatar n lebɣi n uwanak ad yesnegtmu aḥric-a n tmagit taɣelnawt yernu yeqbel, am wakken yewjed, ad yettekki deg umahil amyallan deg ukatar n umciweṛ, war ma yella-d waya s lḥir neɣ s tẓerwizit », ɣef wakken ay d-yerna ulɣu n Useqqamu Unnig i Timmuzɣa.

I lmend n waya, yernu imi seg melmi kan ay yeṭṭef uneɣlaf-a adeg-nnes ɣef yiɣef n uɣlif n usegmi, yenna-d dakken yeḥwaj ad yeddem akud ay as-yessefken akken ad yessen s telqey akaram n uselmed n tutlayt tamaziɣt yernu ad imahel fell-as akken iwata.

Mass Assad yenna-d dakken yewjed ad yili umahil n ticcurka gar tsudut-nnes d uɣlif n usegmi aɣelnaw yernu yefka-as i uneɣlaf n usegmi akaram yeqqnen ɣer tesmilt tuxliḍt seg wasmi ay d-yettwassebded ass n 21 Fuṛaṛ 2015 armi d asmi ay tga timlilit-nnes taneggarut, ass n 8 Yulyu 2015, ɣef wakken ay d-yerna uɣbalu-a.

 

Awal ɣef uselmed n tmaziɣt gar uneɣlaf n usegmi d umaru amatu n Useqqamu Unnig i Timmuzɣa
  Yeffeɣ-d ass n : Akras, 18 Meɣres 2020 14:46     Taggayt : LEZZAYER     Ɣran-t : 9 n tikkal   Bḍu