Menu principal

Menu principal

Lezzayer-Miksik – Timlilit tammidwant: « Lezzayer ad tili d tamihawt ɣef Tmura n Wadda »

Yeffeɣ-d ass n : Laṛebɛa, 14 Tubeṛ 2020 10:16   Ɣran-t : 2 n tikkal
Lezzayer-Miksik – Timlilit tammidwant: « Lezzayer ad tili d tamihawt ɣef Tmura n Wadda »

LEZZAYER TAMANEƔT – Taɣlamt tazzayrit n tcirḍart ad tili d tamihawt ugar n Tmura n Wadda, ɣef wakken ay d-nnan yineɣmasen d yinemciwṛen addalanen ay d-yessawlen deg terga taddalant tamiksikit n ESPN, yernu wwin-d awal-nsen seg wayen ay d-yenna usleɣmay amiksiki, Geraldo Martino yettwassnen s yisem n Tata.

Ɣef leḥsab n Paco Gabriel de Anda, d aneɣmas n terga n ESPN yernu d amcirḍar agraɣlan aqbur n Miksik, Lezzayer d taɣlamt yetturaren urar aneẓẓaw ugar n win n Tmura n Wadda, yernu yesmekti-d s uḥṛas ay ḥeṛṛsen yimuraren izzayriyen ifnaten-nsen akken ad d-rren tacirt mi ara asen-tettwakkes.

« Amgerrad gar Tmura n Wadda d Lezzayer netta taneggarut-a ur k-tettaǧǧa ara ad turared. Timura n Wadda ad k-ǧǧent ad turared, deg wakud aydeg Lezzayer ur k-tettaǧǧa ara. Taɣlamt tazzayrit d tin ara yesɛewqen afna-nnes mi ara as-yekkes tacirt, sakkin, mi ara tt-id-tṣaḥ tcirt, ad tt-tejmeɛ yernu imuraren-nnes d iruraden, d uẓwiren yernu ẓeddmen aṭas akken ad armen ad ssidfen iswi », ɣef wakken ay d-yenna.

Hector Huerta, yellan daɣ d anemciweṛ n terga-a tamiksikit, yesmekti-d, seg yidis-nnes, s yidisan yelhan n teɣlamt tazzayrit yernu yenna-d dakken « Lezzayer tesɛa 18 n yimuraren yetturaren deg Tuṛuft, gar-asen 8 deg Fṛansa, sin deg Ṭṭalyan, sin deg Langliz, ma d wiyaḍ deg Lalman, Spenyul, Ṭṭerk, Puṛtugal, Rrus, Biljik, Tagelda Tasaɛudit d Qaṭar. Llan deg-s daɣ yitran am Riyad Mahrez yellan d yiwen seg yimuraren igermawen akk n teɣlamt-a yernu d yiwen seg yimenyafen n Pep Guardiola deg Manchester City anda ay yezmel agatu n 60 n yimelyunen n tlibriwin ».

Ɣef leḥsab n uneɣmas-a yemmuzzgen deg tcirḍart, « mer ad turar Miksik s teɣlamt tamlellayt, ad d-temlil uguren d imeqqranen. Ur yessefk ara ad nettu imuraren niḍen ur yellin ara d ixataren aṭas am unemzaɣ Aissa Mandi, acrik n Diego Lainez d Andres Guardado deg teɣlamt taspenyulit d Yacine Brahimi, aneɣlam aqbur n ‘Tecatito’ Corona d Hector Herrera deg teɣlamt n FC Porto ».  

 

Lezzayer-Miksik – Timlilit tammidwant: « Lezzayer ad tili d tamihawt ɣef Tmura n Wadda »
  Yeffeɣ-d ass n : Laṛebɛa, 14 Tubeṛ 2020 10:16     Taggayt : ADDAL     Ɣran-t : 2 n tikkal   Bḍu