Menu principal

Menu principal

Tuqqla ɣer usleɣmu: Tiɣri i yinaddalen akken ad qadren aneggaf adawsan

Yeffeɣ-d ass n : Lḥedd, 23 Ɣuct 2020 13:23   Ɣran-t : 265 n tikkal
Tuqqla ɣer usleɣmu: Tiɣri i yinaddalen akken ad qadren aneggaf adawsan

LEZZAYER TAMANEƔT – Tenna-d tewnetlayt n uwanak d-yelhan s waddal n tedɣert, Salima Souakri, ass n ukwas deg Wammas n Usegraw d Usewjed n Teɣlamin Tiɣelnawin deg Sswidaneyya (tawilayt n Lezzayer), dakken inaddalen yessefk ad qadren aneggaf adawsan, yernu yella-d waya deg wawal-nnes i lmend n usefqed n unfafad bu uqacuc ɣer yinaddalen yuɣren ɣer Wuraren Ulampiyen d Wuraren Ulampiyen n Yimeɛdaṛ n 2021.

« Awanak ur yettcuḥḥu ara i wammaken akken ad yebded i yinaddalen n tedɣert taɣelnawt ara d-yeggensesen Lezzayer deg yisihaṛen igraɣlanen ay d-yetteddun, gar-asen Uraren Ulampiyen d Wuraren Ulampiyen n Yimeɛdaṛ n 2021. Nessemlal-d akk ammaken i lmend n ukcaf n unfafad bu uqacuc d uḥraz n tdawsa n yiɣlanen-nneɣ », ɣef wakken ay d-tenna Souakri deg yiwet n terzi ɣef Wammas n Usegrew d Usewjed n Teɣlamin Tiɣelnawin n Sswidaneyya akken ad teḥdeṛ i temhelt tamezwarut n ukcaf n unfafad bu uqacuc.

Amyager-a d win ay yeǧǧan tawnetlayt-a n uwanak ad tessiwel d kra n yinaddalen d-yettgensisen 7 n tfidiṛaliyin taddalanin ɣef tusurt n tkaɣreft-a ay yesbedden asleɣmu d tyakiwin, am wakken ay d-tebder akaten ay yeddem uwanak i uḍman n usewjed yelhan n yinaddalen ama seg yidis alujistan, ama seg yidis adriman neɣ asnajyan.

« Ẓriɣ hullan ayen ay teddrem deg tallit-a taweɛṛant aydeg yebded usewjed d tyakiwin, yernu aya diri-t aṭas i ulɣuɣ n uswir unnig. Aql-iyi da akken ad ken-sbeɣseɣ yernu ad d-wekkdeɣ timeɣsiwt n uɣlif n tillumẓa d waddal d tmarit n uwanak d-yelhan s waddal akken ad d-swejden akk ammaken ilujistanen, idrimanen d yisnajyanen » i lfayda n waddal, ɣef wakken ay d-tenna.

Tawnetlayt n uwanak terza ɣef yiḥedren yemgerraden n wammas-a addalan yeqqlen d « asegnaf amecṭuḥ » wuɣur d-usan aṭas seg yimahalen n Wammas Aɣelnaw n Tesnajya n Waddal akken ad sfeqden inaddalen ɣef unfafad bu uqacuc.

 

Last modified on Ssebt, 05 Ctembeṛ 2020 15:46
Tuqqla ɣer usleɣmu: Tiɣri i yinaddalen akken ad qadren aneggaf adawsan
  Yeffeɣ-d ass n : Lḥedd, 23 Ɣuct 2020 13:23     Taggayt : ADDAL     Ɣran-t : 265 n tikkal   Bḍu