Tameḍrit Taddalant n Leqbayel: 12 n temliliyin war ma terbeḥ ula d yiwet

Yeffeɣ-d ass n : Letniyen, 12 Fuṛaṛ 2018 12:12   Ɣran-t : 46 n tikkal
Tameḍrit Taddalant n Leqbayel: 12 n temliliyin war ma terbeḥ ula d yiwet

LEZZAYER TAMANEƔT – Tameḍrit Taddalant n Leqbayel, ay irebḥen talɣuɣa n Lezzayer 14 n tikkal, teqqel deg tegnit iweɛṛen aydeg ay tezmer ad teɣli ɣer Temɣunt Tis Snat ladɣa imi ay la tettkemmil txeṣṣer timliliyin. Ass n ssebt, d tikkelt tis 12 aydeg ara turar timlilit war rrbeḥ, imi ay tfuk timlilit-nnes d NA Ḥusin Day s 1 ɣer 1 deg ukatar n wass n 19 n wurar deg ukatar n telɣuɣa n Temɣunt 1ut n tcirḍart.  

 Deg tidet, seg wass n 17 Tubeṛ 2017 ur terni Tmeḍrit Taddalant n Leqbayel terbeḥ kra n temlilit deg telɣuɣa, ass aydeg ay terna USM Lḥeṛṛac s 2 ɣer 1 deg ukatar n wass wis 7 n telɣuɣa.

 Dɣa seg wass-nni ay tudef Tmeḍrit Taddalant n Leqbayel deg tallit yeqquren ay tt-yessawḍen ɣer wemkan wis 12 deg usettef s 19 kan n tenqiḍin yernu txuṣṣ-itt kan yiwet n tṣeddart akken ad taweḍ ɣer wasun n teɣlamin ay izemren ad ɣlint ɣer Temɣunt Tis Snat.

 Ccwal ufḍiḥ aydeg yella uqusis n Tmeḍrit Taddalant n Leqbayel ama seg yidis n tmehla-nnes, ama seg yidis n yesleɣmayen d ayen ay d-yeglan s lateṛ n diri ɣef teɣlamt-a ay yessefken ad tales leḥsabat-nnes seg lqaɛa akken ad tessiweḍ ad teqqim deg Temɣunt Tamezwarut.

 Aselway amaynu n Tmeḍrit Taddalant n Leqbayel, Cherif Mellal, yettwafren ass n laṛebɛa yezrin, yernu ulac ccek dakken ad yesɛu aṭas n ccɣel akken ad yefru uguren n uqusis-a yernu ad t-id-yerr ɣer webrid n rrbeḥ.

 Ma d asleɣmay Noureddine Saadi yenna-d, ass n ssebt, deffir temlilit mgal NA Ḥusin Day, dakken ur yettixir ara, am wakken ay d-yerna dakken aselway n uqusis iga deg-s laman.

Tameḍrit Taddalant n Leqbayel: 12 n temliliyin war ma terbeḥ ula d yiwet
  Yeffeɣ-d ass n : Letniyen, 12 Fuṛaṛ 2018 12:12     Taggayt : ADDAL     Ɣran-t : 46 n tikkal   Bḍu