Menu principal

Menu principal

Anfafad bu uqacuc: Aɣlif n tkerrazt yerra tajmilt i yijenyuṛen

Yeffeɣ-d ass n : Letniyen, 06 Yulyu 2020 13:48   Ɣran-t : 55 n tikkal
Anfafad bu uqacuc: Aɣlif n tkerrazt yerra tajmilt i yijenyuṛen

LEZZAYER TAMANEƔT – I lmend n umulli wis 58 n tmeɣra n uzarug d tmeḍrit, yerra uɣlif n tkerrazt tajmilt i kra n yijenyuṛen n tkerrazt ay yettekkan deg tḥemliwin yemgerraden n temsetlelt ay yessuddes uwanak i umennuɣ mgal unfafad bu uqacuc, ɣef wakken ay d-yenna uɣlif deg yiwen n ulɣu.

« I lmend n umulli aslag wis 58 n tmeɣra n uzarug d tmeḍrit, ssuddsen tafugla ddaw leɛnaya n uneɣlaf n tkerrazt d usnegmu awmazir, ass n 4 Yulyu deg tesɣimt n Texxamt Taɣelnawt n Tkerrazt, akken ad rren tajmilt i yijenyuṛen n tkerrazt d-yettgensisen 12 n twilayin imi ay ttekkan deg tḥemliwin n temsetlelt d tukci n tallalt deg ukatar n wussisen n uwanak deg umennuɣ mgal tkaɣreft n unfafad bu uqacuc », ɣef wakken ay d-yenna yiwen n ulɣu ay d-yeffɣen deg usebter unṣib n Facebook n uɣlif.

I lmend n waya, xebbren-d ɣef wussisen ay gan yijenyuṛen-a i lmend n usnegmu n tkerrazt, yernu iwekked-d ulɣu-a dakken yessefk ad d-tili tesmunit i yikataren-a.

Deg tfugla-a, rran tajmilt i umaswaḍ amatu n uɣlif n tkerrazt, agensas n uneɣlaf n tkerrazt d mennaw n yikataren d yimasayen d-yettgensisen aɣlif n usislem, Asenduq Aɣelnaw n Tmilalt Takerrazant, Tanarit Taɣelnawt n Tmeṣkiwin Tiwmazirin d Usudu Aɣelnaw n Unadi Aseddakalan n Lezzayer.

Ḥedṛen daɣ yigensasen n Tuddsa Taɛṛabt i Usnegmu Akerrazan, Asudu Atwilan n Tyafutin Timeqranin d mennaw n tiddukliwin n tmetti taɣarimt, ɣef wakken ay tt-id-yextem ulɣu-a.

 

Last modified on Lexmis, 09 Yulyu 2020 11:34
Anfafad bu uqacuc: Aɣlif n tkerrazt yerra tajmilt i yijenyuṛen
  Yeffeɣ-d ass n : Letniyen, 06 Yulyu 2020 13:48     Taggayt : TIMETTI     Ɣran-t : 55 n tikkal   Bḍu