Menu principal

Menu principal

Lezzayer Tamaneɣt: Asira Aɣelnaw n Usedwes yessuddes taḥemla n uṣeddeq n yidammen

Yeffeɣ-d ass n : Letniyen, 29 Yunyu 2020 12:41   Ɣran-t : 0 n tikkal
Lezzayer Tamaneɣt: Asira Aɣelnaw n Usedwes yessuddes taḥemla n uṣeddeq n yidammen

LEZZAYER TAMANEƔT – Icar-d Udiwan Aɣelnaw n Usizrer, ass n usamas, taḥemla n uṣeddeq n yidammen s usemyuddes d Tnegga Taɣelnawt n Yidammen, i lmend n usedwet n wayen ḥwajen yisegnafen d idammen, ladɣa imi ay xuṣṣen aṭas yidammen deg tallit-a n usekmen.

Deg yiwet n tesguri i Tnegga n Yisalan n Lezzayer, tenna-d temkelleft s teɣwalt deg Usira Aɣelnaw n Usedwes, Massa Meriem Ouyahia, dakken taḥemla-a « ay yettwacaren ass-a deg tesɣimt n usira ur tezri ara kan imahalen n usira, wanag terẓem i wakk iɣermanen yeɣsen ad ṣeddgen idammen akken ad yekkes lexṣaṣ ameqran yellan deg yisegnafen deg wayyuren-a yezrin ».

Seg wasmi ay d-yebda ubayyur n unfafad bu uqacuc, qqlen xuṣṣen aṭas yidammen deg yisegnafen imi iɣermanen qqlen ttaggaden ad ddun ɣer yisegnafen uɣaf ad ten-id-yenṭeḍ waḍḍan n unfafad-a, ula ma ddmen yisegnafen akaten n uḥezzeb akken ad ttwaḥerzen wammasen n tukksa n yidammen seg waḍḍan-a.

Deg tegnit-a taweɛṛant ay d-yellan ɣef lǧal n tkaɣreft n unfafad bu uqacuc, llan aṭas n yimuḍinen, ladɣa igerda, ay yeḥwajen idammen, ɣef wakken ay d-twekked.

Ticulliḍin n yidammen ay d-yettwasgerwen deg temhelt-a n yiwen n wass ad ten-fken i usegnaf n Samir-Zemirli (Lḥeṛṛac), ɣef wakken ay d-txebber Massa Ouyahia.

Tasentayt-a n temsetlelt iswi-nnes d asebɣes n yiɣermanen akken ad kemmlen ad ttṣeddiqen idammen ula ma tella tkaɣreft n unfafad bu uqacuc, yernu yessefk ad d-yili waya i lmend n usukkes n tmeddurin n yimuḍinen, ɣef wakken ay d-tenna Massa Ouyahia, ay d-yernan dakken ttwaddmen akk wakaten n uḥezzeb i lmend n uḥraz n wid ara iṣeddqen idammen.

 

Lezzayer Tamaneɣt: Asira Aɣelnaw n Usedwes yessuddes taḥemla n uṣeddeq n yidammen
  Yeffeɣ-d ass n : Letniyen, 29 Yunyu 2020 12:41     Taggayt : TIMETTI     Ɣran-t : 0 n tikkal   Bḍu