Iflawen-a (ay d-yessuffuɣen gar 30 d 40 n yilitren n waman i tasint) gan-ten deg yisemlen yemgerraden, ladɣa i lmend n ussedger n waman n 3 n tesdawiyin d wammasen imdinanen imaynuten ay d-yusan tama n tesdawiyin-a. Aflaw n wasun n « Tlat » ad yessedger aman i yimezdaɣen n yiɣrem n Ayt Yezgen d yiɣrem amaynu n Tfilalt (n Ayt Yezgen) d Talalt (taɣiwant n Bunuṛa) ɣef wakken ay d-yenna unemhal n ugzum n waman, Djamel Belahrache.

Aflaw n wasun n Buhrawa ad yessejhed assedger n waman n tissit deg ugmam n Buhrawa ay d-yusan deg yijifaṛ n temdint n Tɣerdayt d wasunen n Tuzuz d Axelxal deg tɣiwant n Tɣerdayt.  

Aflaw n Zelfana ad yessedger aman i yigmamen n tɣiwant-a aydeg yella uḥemmam, ɣef wakken ay d-yenna unemhal-a.

Ṣeggmen daɣ 6 n yixezzanen n waman deg tɣiwanin n Metlili (3), Sebsab (1), Menṣura (1) d Berreyyan (1), ɣef wakken ay d-yenna Mass Belahrache.

Ulsen daɣ i 180.000 n yimitren n tsenfar n ussedger n waman deg twilayt n Tɣerdayt akken ad frun ugur n ungay n waman deg wakal, ɣef wakken ay d-yenna.

« Llan-d akk yimahilen-a akken ur ttxaṣṣan ara waman deg wayyur n Remḍan d unebdu n useggas-a », ɣef wakken ay d-yenna unemhal n teɣbula n waman n twilayt-a.

Tawilayt n Tɣerdayt tesɛa, ass-a, 150 n yiflawen n ussedger n waman, gar-asen 6 ḥazen-ten i temguri yesnu sɛan akettur amakki n 270.000 n yimitren igasasen (m3) deg wass. Llan daɣ 110 n yixezzanen n waman ay yesɛan akettur amakki n 117.000 n yimitren igasasen (m3) yernu tesɛa twilayt-a aẓeḍḍa n tsenfar n 1.500 n yikilumitren, ɣef leḥsab n yisefka n tmehla n teɣbula n waman.

Aktamur n tuqqna ɣer uẓeḍḍa n waman n tissit deg twilayt n Tɣerdayt yewweḍ ɣer 98% s tlemmast n 198 n yilitren n waman i yal amezdaɣ deg wass.