Menu principal

Menu principal

Lezzayer ad tkemmel ad tesseqdac aneggaf n udawi s tekluṛukint

Yeffeɣ-d ass n : Lexmis, 28 Mayu 2020 10:16   Ɣran-t : 1 n tikkal
Lezzayer ad tkemmel ad tesseqdac aneggaf n udawi s tekluṛukint

LEZZAYER TAMANEƔT – Lezzayer ad tkemmel aseqdec n uneggaf n udawi s thidṛukluṛukint i udawi n unfafad bu uqacuc, ladɣa imi aneggaf-a yessujji aṭas n medden seg waḍḍan-a deg Lezzayer, am wakken ur d-iban wacemma n diri deg yimuḍinen yettwadiwan yes-s, ɣef wakken ay d-yenna, ass n ukras deg Lezzayer Tamaneɣt, Mass Bekkat Berkani yellan d amaslaḍ deg Tseqqimt Tussnant n Uḍfar n Umhaz n Tkaɣreft n Unfafad bu Uqacuc Amaynu.

Deg yiwet n tesguri i Tnegga n Yisalan n Lezzayer, Mass Bekkat, yellan daɣ d aselway n Useqqamu Aɣelnaw n Umyersi n Yimsujjiyen Izzayriyen, yerna-d dakken aseqdec n uneggaf-a yella-d deg ukatar ussnan yernu imuḍinen yettwadiwan yes-s ttwaḍfaren s udeqqeq ula deffir ma jjin.  

Tasguri-a tella-d deffir tzernant ay d-yellan mi d-tessuffeɣ Tuddsa Tanmaḍalt n Tdawsa kra n lewṣayat aydeg d-tger tiɣri i usebded n useqdec n tekluṛukint i udawi n yimuḍinen  yesɛan anfafad bu uqacuc. Lewṣayat-a llant-d deffir ma teffeɣ-d yiwet n tezrawt deg tesɣunt tasnajyant n « The Lancet » ay d-yennan dakken takluṛukint ur tesɛi ara tamellilt deg udawi n unfafad n Covid-19.

Ɣef leḥsab n Mass Bekkat, tilɣa ay d-yeffɣen deg tesɣunt-a d « timsullsanin » yernu d tid aydeg yella « ccek » imi ay yezmer ad yili wassaɣ gar kra n yilubiyen d tnarmin tigraɣlanin d telɣa-a akken ad ssiwḍen ad ssenzen isafaren ɣlayen ugar n tekluṛukint.

 

Lezzayer ad tkemmel ad tesseqdac aneggaf n udawi s tekluṛukint
  Yeffeɣ-d ass n : Lexmis, 28 Mayu 2020 10:16     Taggayt : TADAWSA-TUSSNA-TASNASTWILT     Ɣran-t : 1 n tikkal   Bḍu