Menu principal

Menu principal

Anfafad bu uqacuc: Timura tifriqiyin nbegesent-d akken ad sbeddent azraɛ n waḍḍan-a

Yeffeɣ-d ass n : Ljemɛa, 20 Meɣres 2020 15:52   Ɣran-t : 1178 n tikkal
Anfafad bu uqacuc: Timura tifriqiyin nbegesent-d akken ad sbeddent azraɛ n waḍḍan-a

LEZZAYER TAMANEƔT – Nbegsent-d tmura tifriqiyin yernu bdant ssuggutent ussisen-nsent akken ad ḍemnent taɣellist d tdawsa tanagdudt yernu ad sbeddent azraɛ n unfafad bu uqacuc, ladɣa imi aḍḍan-a yegla s 9.000 n tmeddurin deg umaḍal seg wasmi ay d-iban deg Dujembeṛ.

Seg wasmi ay d-tettwasummel tejṛut tamezwarut deg Tefriqt, ass n 14 Fuṛaṛ deg Maṣer, azal n 30 n tmura tifriqiyin niḍen ay iḥuza waḍḍan-a, yernu ttwakecfent-d 400 n tejṛa deg-sent.

Inabaḍen ifriqiyen ddmen akaten d umqiten am ulesses n uwliwel seg udeg ɣer wayeḍ, amdal n yiɣerbazen d uɛzal n temnaḍin d ugdal n tuffɣa i lmend n usebded n uzraɛ n waḍḍan-a.

Maṣer teɣtes ad tessigel affugen ay d-yettekken seg uzɣar seg wass n ukwas arma d 31 Meɣres.

Deg Kamrun, iɣerbazen ttwamedlen seg wass n ukras. Ttwagedlen daɣ yimsegrawen n wugar n 50 n yimdanen. Ma d tiddit seg ugmam ɣer wayeḍ neɣ seg temdint ɣer wayeḍ ur yessefk ad d-yili ala ma terra tmara.

Tunes tga-d, seg wass n ukras, agdal n tuffɣa gar tis 6:00 n tmeddit arma d tis 6:00 n tnezzayt deg wakk agelluy aɣelnaw arma teffeɣ-d tsunḍa niḍen.

Ɣef leḥsab n yiwen n umasay unnig n Tuddsa Tanmaḍalt n Tdawsa, mazal terẓem tewwurt akken ad tettwarnu tkaɣreft-a deg Tefriqt s uqader n wakaten n wuɣus d usefrey.

Ibrahima Soce Falle, anemhal amatu amalal n Tuddsa Tanmaḍalt n Tdawsa d-yelhan s tetrabin, yenna-d dakken Tafriqt tesɛa akettur akken ad teḥkem deg ubayyur-a,  d acu kan, iɛeyyen-d dakken ma yezreɛ waḍḍan-a, inagrawen ifriqiyen n tdawsa ur as-zemmren ara.

Mary Stephen, d-yelhan s usewjed i tetrabin tidawsanin deg tnarit tamnaḍant n Tuddsa Tanmaḍalt n Tdawsa i Tefriqt, tenna-d, deg yiwet nt diwennit d tnegga n Ccinwa Tamaynut, dakken iswi amezwaru n tmura tifriqyin netta d anadi ɣef tejṛut tamezwarut n unfafad bu uqacuc, ma ulac, ma yezreɛ waḍḍan, ur zemmren ara ad t-ḥekment.

 

 

Last modified on Lḥedd, 22 Meɣres 2020 13:26
Anfafad bu uqacuc: Timura tifriqiyin nbegesent-d akken ad sbeddent azraɛ n waḍḍan-a
  Yeffeɣ-d ass n : Ljemɛa, 20 Meɣres 2020 15:52     Taggayt : TADAWSA-TUSSNA-TASNASTWILT     Ɣran-t : 1178 n tikkal   Bḍu