Tabatent: Udfen waman ɣer kra n yixxamen yernu xeṣren kra n yibriden

Yeffeɣ-d ass n : Lḥedd, 15 Yebrir 2018 15:25   Ɣran-t : 31 n tikkal
Tabatent: Udfen waman ɣer kra n yixxamen yernu xeṣren kra n yibriden

TABATENT – Udfen waman n unẓar ɣer kra n yixxamen ass n ssebt tameddit deg temdint n Tbatent d kra n tɣiwanin n twilayt-a am wakken ay xeṣren kra n yibriden ɣef lǧal n unẓar d ubruri ay d-iwten s waṭas ass-nni.

Azal n 50 n yimilimitren n unẓar ay d-iwten deg wazal n usrag dɣa d aya ay ireglen aẓeḍḍa n uɣram n waman yernu yella-d d ssebba i yiḥemmalen ay yessadfen aman ɣer wacḥal n yixxamen deg Qcida, Zzmala, Bouakal, Afrag n Uflaw d Ubrid n Taẓult, ɣef wakken ay d-yenna yimkellef s teɣwalt n ummesten aɣarim, Takieddine Benaziz.

Ɣef leḥsab n uɣbalu-a, gan yiseɣsayen 50 n tgermanin gar-asent 30 deg tdayṛa n Tbatent, ma d tiyaḍ deg Lmeḍher, Seryana, Barika, Ɛin Ttuta d Taẓult, war ma llant-d teɣtas talsanin.

Kra n yixxamen ɣusan yiɣerban-nsen, deg wakud aydeg ixxamen niḍen yedrem-d ssqef-nsen, am wakken ay xeṣren kra n yisgulaf inagduden ɣef lǧal n waman.

Ma d aɣella n umeẓlu n uɣellet d ubdad i uẓeḍḍa abridan deg tmehla n yimahilen inagduden, Abdelkarim Belkacem, yenna-d dakken aḥmal n waman d ubruri yerẓa ḍḍrufat n kra n yibriden iɣelnawen d yibriden n twilayt gar-asen abrid aɣelnaw wis 3 armi d tilisa n twilayt n Um Lebwaqi d ubrid aɣelnaw wis 87 ay yetteddun ɣer Txencelt, am wakken ay d-yella daɣ usyax sdat yiwet n tleggit deg ubrid aɣelnaw wis 28 ɣer tuffɣa n tɣiwant n Tilatu.

Llan-d daɣ kra n yixeṣṣaren deg ubrid n twilayt 165 yeqqnen taɣiwant n Bumya ɣer ubrid aɣelnaw wis 3, d ubrid n twilayt 26 ay yeqqnen taɣiwant n Fesdis ɣer twilayt n Um Lebwaqi, yernu xesṛen daɣ yibriden ay d-yessemḥilliqen i temdint n Tbatent.

Tigermanin n yimeẓla n yimahilen inagduden kemmlent deg yiḍ n wass n ssebt d lḥedd yernu sbegsen-d ttawilat ay yessefken am yiferrasen n udfel akken ad fersen abrid seg ubruri d waluḍ.

Last modified on Lḥedd, 15 Yebrir 2018 15:29
Tabatent: Udfen waman ɣer kra n yixxamen yernu xeṣren kra n yibriden
  Yeffeɣ-d ass n : Lḥedd, 15 Yebrir 2018 15:25     Taggayt : TIMNAḌIN     Ɣran-t : 31 n tikkal   Bḍu