Bgayet: medlen yimezdaɣen n Wegni n Sihel (Ibeṛbacen) agudu anɣiwan

Yeffeɣ-d ass n : Ttlata, 06 Fuṛaṛ 2018 12:19   Ɣran-t : 457 n tikkal
Bgayet: medlen yimezdaɣen n Wegni n Sihel (Ibeṛbacen) agudu anɣiwan

BGAYET– Medlen yimezdaɣen n yeɣrem n Wegni n Sihel, deg Yibeṛbacen (75 n yikilumitren deg wenẓul n Bgayet), ass n letniyen, agudu anɣiwan akken ad d-ccetkin ɣef lmaḍerra n ugudu-a ama ɣef yimezdaɣen n temnaḍt-a, ama ɣef twennaḍt s umata, ɣef wakken ay aɣ-d-txebber tɣiwant.

I lmend n waya, reglen yimezdaɣen n yeɣrem-a adaf ɣer ugudu-a yernu ur ǧǧin ara akk imseddayen ad adfen neɣ ad ffɣen seg ugudu-a. D aya ay d-yeglan, kra kan n yesragen sakkin, s wugur deg tɣiwant imi dindin kan mbabbent-d tursaḍ deg wacḥal n yegmamen yernu ur d-usin ara wid ara tent-yekksen.

« Tagnit ay yellan yagi tettwaɣ, terna tkemmel », ɣef wakken ay d-yenna Mass Bihmane, ay yettmahalen d anawar, d acu kan yenna-d dakken atan ɣer yidis n umussu-a ɣef lǧal n lmaḍerra ay d-yekkan seg ugudu-nni.

Wid ay izedɣen sdat ugudu-a ddren deg wahes ɣef lǧal n yir rriḥa, awwu d ussimes n twennaḍt ay d-yekkan seg wemkan-nni, ɣef wakken ay d-iwekked, am wakken ay d-yerna dakken ɣef lǧal n wammus-a, xlant ula d tiɣrasin n tzizwa ay yellan ččuṛent, iɣezran n waman qqlen umsen yernu qqurent ula d tizemrin. Nnig waya, ggten daɣ yiɣersiwen inemḍaren yernu yeqqel waya yessaggad imezdaɣen n temnaḍt-a.

Yenna-d unawar-a dakken qqlen yimezdaɣen n temnaḍt-a ur bɣin ara agudu deg wemkan-nni yernu ur ḥwajen ara ula d aṣeggem neɣ allus n utewwel n ugudu-a.

Amdal n ugudu-a ad d-yili i lebda, ɣef wakken ay d-yenna yiwen seg yimekfuḍa n umussu-a, yernu yenna-d dakken aɣtas-a d amazday yernu yekka-d seg yiɣermanen.

Ma d aselway n tɣiwant, Saddek Akrour, yenna-d dakken iḥulfa i ussuter n yimezdaɣen, maca yenna-d dakken aɣtas n wemdal n ugudu-a ur iṣeḥḥa ara acku aya yessewɛaṛ tagnit n ussizdeg n tɣiwant-a.

 

D acu kan, yenna-d daɣ dakken ad yeg akk ayen umi yezmer s uttekki n tmehla n twennaḍt, akken ad tewwlen agudu-a xir n wakken yella akken ur d-igellu ara waya s lmaḍerra i yimezdaɣen ay iqerben ɣer-s.

Last modified on Laṛebɛa, 07 Fuṛaṛ 2018 12:25
Bgayet: medlen yimezdaɣen n Wegni n Sihel (Ibeṛbacen) agudu anɣiwan
  Yeffeɣ-d ass n : Ttlata, 06 Fuṛaṛ 2018 12:19     Taggayt : TIMNAḌIN     Ɣran-t : 457 n tikkal   Bḍu