Izirig n Msila-Bugezzul (Lemdeyya) ad yewjed deg Ctembeṛ ay d-yetteddun

Yeffeɣ-d ass n : Ttlata, 06 Fuṛaṛ 2018 12:09   Ɣran-t : 716 n tikkal
Izirig n Msila-Bugezzul (Lemdeyya) ad yewjed deg Ctembeṛ ay d-yetteddun

MSILA– Izirig n webrid n wuzzal ara yeqqnen Msila ɣer Bugezzul (Lemdeyya) s teɣzef n 151 n yikilumitren ad yewjed deg Ctembeṛ n 2018, ɣef wakken ay d-yenna, ass n letniyen deg Msila, uneɣlaf n yimahilen inagduden, Abdelghani Zaalane.

« Izirig-a ad yerẓem tilemmiẓin tidamsanin n tidet i yemseftiyen ay yettwaɛerḍen akken ad d-asen ad ḍḍfen amkan deg wasunen n wermud ayɣef ara yekk webrid-a », ɣef wakken ay d-yenna uneɣlaf mi yessefqed taṛmist n weɣraf n yikudaren n webrid n wuzzal deg tɣiwant n Bouti-Sayah.

Abrid-a n wuzzal ad yessejhed aẓeḍḍa aɣelnaw n umesni n yelzazen d yemsiklen, ɣef wakken ay d-iwekked Zaalane ay d-ixebbren daɣ dakken ur yettɛeḍḍil ara ad yebdu uɣellet n yizirig gar Msila d Lezzayer Tamaneɣt, d win gar Msila d Tbatent, deffir ma sɣan-d timacinin timaynutin.

Tawilayt n Msila tesfaydi-d, seg useggas n 2010, seg 50 n yimelyaṛen n yidinaṛen i ussetrer n 800 n yikilumitren n yebriden iɣelnawen d yebriden n twilayt. Yenna-d daɣ uneɣlaf dakken yettwali dakken assuter n Yemsiliyen akken ad sɛun adaf ɣer Webrid Amazzal Agmuḍ-Ataram d « uzrif », yernu yenna-d dakken aya ad yeḥwij asselhu n webrid aɣelnaw wis 60 ula ma aya yeḥwaj idrimen.

Deg wayen yerzan axelleṣ i lmend n wenhaṛ deg Webrid Amazzal Agmuḍ-Ataram, yenna-d Mass Zaalane dakken aya ad d-yebdu asmi ara ifak lebni n tsersa ay yessefken i waya, yernu iwekked-d dakken atig ara yettwaxellṣen ad yili « meɛqul ».

Yessefqed uneɣlaf taṛmist n weɣraf n yikudaren n Bouti-Sayah, d tin ay yessagaẓen acḥal n yicanṭiyen n lebni n webrid n wuzzal deg temnaḍin yemgerraden n tmurt.

Sfehmen-as-d daɣ i uneɣlaf ɣef tegnit wuɣur uwḍent tezrawin n lebni n yizirigen n webrid n wuzzal n Ɛin Leḥǧel-Tubiret d Msila-Ǧelfa.

 

Tirzi n uneɣlaf ɣef Msila d tin aydeg ara d-yili uẓẓunẓu n webrid n ussemḥilleq i temdint n Sidi Ɛisa.

Izirig n Msila-Bugezzul (Lemdeyya) ad yewjed deg Ctembeṛ ay d-yetteddun
  Yeffeɣ-d ass n : Ttlata, 06 Fuṛaṛ 2018 12:09     Taggayt : TIMNAḌIN     Ɣran-t : 716 n tikkal   Bḍu