Leɣwaṭ: Hocine Necib yeẓẓunẓa uggug n Seklafa deg tɣiwant n Wad Mzi

Yeffeɣ-d ass n : Lḥedd, 04 Fuṛaṛ 2018 10:57   Ɣran-t : 86 n tikkal

LEƔWAṬ – Yeẓẓunẓa, ass n ssebt, uneɣlaf n teɣbula n waman, Hocine Necib, uggug n Seklafa deg tɣiwant n Wad Mzi, 80 n yikilumitren deg ugafa-utrim n Leɣwaṭ.

Deg yijifeṛ n uẓẓunẓu-a ay yesɛan tazmert n wexzan n 40 n yimelyunen n yimitren igasasen (deg useggas), yenna-d Mass Necib dakken aya d ayen ara yesjehden afrag aɣelnaw n wuggugen imi, s waya, tuweḍ Lezzayer tesɛa 79 n wuggugen deg temnaḍin yemgerraden n tmurt.

« Tiɣbula n waman d yiwet seg tuzwirin n uwanak », yernu aya yettban-d s yisenfaren n ussefti ay yettwaqeblen i wegzum-a, ɣef wakken ay d-yenna Mass Necib.

Yenna-d daɣ uneɣlaf dakken taṛmist n Cosider (ay yebnan uggug-a) tesseqdec tarmit-nnes meɣɣren yernu llant deg Lezzayer teṛmisin ay izemren ad gent tamazga i teṛmisin tiwerdaniyin yemmuzzgen deg taɣult-a.

I lmend n waya, ixebber-d dakken yettwaddem weɣtas i ussemɣer n ukettur n wexzan n wuggug n Seklafa akken ad yernu s 15 n yimelyunen n yimitren igasasen, dɣa s waya ara yaweḍ ukettur-nnes amakki ɣer 55 n yimelyunen n yimitren igasasen.

Menɣir afraq n waman n tissit, uggug-a, ɣef wakken ay d-ixebber uneɣlaf, ad yettwaɣellet daɣ deg wessway n wakal n tkerrazt, am wakken ara yessejhed isenfaren n ussekki n waman seg wenẓul n tmurt ɣer Yegnan Unnigen.

I lmend n waya, yessawel-d daɣ uneɣlaf ɣef uttekki axatar n uɣellet n waman ijummanen i usseṛwu n ussuter n waman deg twilayt-a deg wayen yerzan assway n tkerrazt d wefraq n waman n tissit, am wakken ay d-yenna dakken tawilayt n Leɣwaṭ tettagem-d 23 n waman-nnes seg wakal-nnes yernu aya yezmer ad yaweḍ arma d 50% seg-a ɣer tgara n 2018.

Iḥettet-d Mass Necib dakken yessefk daɣ ad ttwaẓẓun yisekla deg tallunin ay d-yezzin i wuggug-a akken ad ḥudden yisekla-a uggug seg waluḍ ay izemren ad d-yawer ɣer-s, yernu ad d-yejbed daɣ waya imerrayen.

Yetter daɣ uneɣlaf, deg tuzzya-nnes ɣef twilayt n Leɣwaṭ, ɣef yimahilen n ucanṭi n ussenfel n waman deg umeccaq n 3,3 n yikilumitren, seg wasif n Cherki ɣer wuggug n Seklafa.

Uggug-a yesqam-d 7,69 n yimelyaṛen n yidinaṛen yernu d win ara yesswen 2000 n yiqeṭṭaren n wakal ankerraz d wefraq n waman i 14 n tɣiwanin, ɣef wakken ay d-tebder tsentut tatwilant n usenfar-a.

Deg tɣiwant n Tejmut, yesla uneɣlaf i ussefhem yeqqnen ɣer uheyyi n yiwen n wuggug n 250 n yimitren deg teɣzef.

Tirzi n uneɣlaf n teɣbula n waman ad tkemmel, ass n lḥedd, s ussefqed n wacḥal n temṣukin d tsersa yellan yagi deg temdint n Leɣwaṭ.

Last modified on Lḥedd, 04 Fuṛaṛ 2018 11:01
Leɣwaṭ: Hocine Necib yeẓẓunẓa uggug n Seklafa deg tɣiwant n Wad Mzi
  Yeffeɣ-d ass n : Lḥedd, 04 Fuṛaṛ 2018 10:57     Taggayt : TIMNAḌIN     Ɣran-t : 86 n tikkal   Bḍu