Menu principal

Menu principal

Arkaḍ n yizerfan n umdan deg Tniri Tutrimt yettwawedgen d aɣbalu n ccwal deg temnaḍt

Yeffeɣ-d ass n : Lexmis, 02 Yulyu 2020 11:03   Ɣran-t : 0 n tikkal
Arkaḍ n yizerfan n umdan deg Tniri Tutrimt yettwawedgen d aɣbalu n ccwal deg temnaḍt

MADRID – Arkaḍ n yizerfan n umdan deg Tniri Tutrimt yettwawedgen yeqqel d aɣbalu n ccwal deg temnaḍt n Tefriqt n Ugafa, ɣef wakken ay d-tenna yiwet n tezrawt tasdawant taspenyulit ay d-yegren tiɣri i usemɣer n lewṣaya n Minursro akken ad d-telhu s usnuḍef n yizerfan n umdan, am wakken ay d-twekked dakken tanqiḍt-a tedda-d deg lewṣaya tamezwarut ay yettunefken i tuɣdaḍt-a n Yiɣlanen Yeddukklen.

Tazrawt-a ay tga tesdawit taspenyulit n Cadiz d tin ay d-yennan dakken tamsalt n yizerfan n umdan tetturar tamlilt deg usmelwi n wassaɣen igraɣlanen yernu mi ur ttwaqadaren ara, aya yezmer ad yernu deg ccwal, aṭṭerḍeq n yimyenkafen umrigen d ukemmel-nsen.

Deg wayen yerzan Tiniri Tutrimt, « arkaḍ n yizerfan n umdan yeqqel d aɣbalu n ccwal ay iḥuzan tamnaḍt-a », dɣa ɣef waya ay yessefk ad d-telhu Tuɣdaḍt n Yiɣlanen Yeddukklen i Usuddes n Tsefrant deg Tniri Tutrimt (Minurso) s uḍfar n uqader n yizerfan n umdan ɣer yidis n tɣawsiwin akk niḍen ayyes d-telha.

Tuɣdaḍt n Minurso tettwasseɣnew-d deg 1991 i usnuḍef n usebded n yimenɣi gar yiɣallen imeṛṛukiyen d Terni n Polisario d usuddes n tsefrant n uguccelman deg Tniri Tutrimt yettwawedgen. « Tuɣdaḍt n Minurso d nettat ay d tuɣdaḍt tayiwnant n uḥraz n talwit ur yesɛin ara adabu akken ad tesnuḍef aqader n yizerfan n umdan ula ma 40 n yiseggasen aya seg wasmi ay ttwarkaḍen yizerfan n umdan » deg Tniri Tutrimt, ɣef wakken ay d-iger umeskar n unadi-a tamawt.

Nnig waya, deg 2016, iduba imeṛṛukiyen n uwdag ẓẓɛen-d imahalen iɣarimen n Minurso, yernu aya yesskanay-d dakken Meṛṛuk ur tettemyalal ara d tuɣdaḍt-a akken ad teg amahil-nnes.

Amnesty International tenna-d dakken deffir waya, kemmlen yiduba imeṛṛukiyen n uwdag ssaggaden yinemzaɣen iwniriyen n yizerfan n umdan, sqarrayen-ten, ttabẓen-ten yernu ttɛassan-ten s lqerb.

 

Last modified on Ljemɛa, 03 Yulyu 2020 17:04
Arkaḍ n yizerfan n umdan deg Tniri Tutrimt yettwawedgen d aɣbalu n ccwal deg temnaḍt
  Yeffeɣ-d ass n : Lexmis, 02 Yulyu 2020 11:03     Taggayt : AMAḌAL     Ɣran-t : 0 n tikkal   Bḍu