Menu principal

Menu principal

Amulli n tlalit n Ho Chi Minh: Amekti n tmeddurt n baba-s n tegrawla tavietnamit

Yeffeɣ-d ass n : Laṛebɛa, 20 Mayu 2020 12:32   Ɣran-t : 56 n tikkal
Amulli n tlalit n Ho Chi Minh: Amekti n tmeddurt n baba-s n tegrawla tavietnamit

LEZZAYER TAMANEƔT – Ivietnamiyen sfuglen, ass n usinas, amulli wis 130 n tlallit n uselway aqbur Ho Chi Minh, baba-s n tegrawla tavietnamit yernu d azamul n umennuɣ mgal usehres, d win ay yefkan tamussni-nnes i uslelli n yimdanen yettwaḍelmen ama deg tmurt-nnes, ama deg tmura niḍen.

Ilul-d Ho Chi Minh ass n 19 Mayu 1890 deg yiwet n twacult tigellilt deg Vietnam yellan, imir-nni, ddaw uɣmar ahersan afṛansi. Deg 1911, yedda ɣer Utaram akken ad inadi ɣef wamek ara teslelli Vietnam iman-nnes. S waya, yedder deg Fṛansa, Iwanaken Yeddukklen d Tgelda Yeddukklen, yernu yemsegma d yimahalen n tmura yimgerraden.

Asmi ay d-tella Tegrawla Tabulcivit n Tubeṛ 1917 deg Rrus, yeqqel yettwasseqneɛ dakken ala tanemlit ay izemren ad tessiweḍ Vietnam ɣer uzarug ummid d yilaw.

Deg yiseggasen n 1920, yettekka deg umussu afṛansi n yimahalen d tuddsiwin niḍen yernu yurem ad d-yessaki iɣerfan yettwashersen akken ad ssutren izerfan-nsen.

Yella gar yimekfuḍa igejdanen n uɣmis n « Le Paria » ay tella tessuffuɣ-it-id yal ayyur gar 1922 d 1926 Tdukli Tagerhersant yellan teqqen ɣer Ukabar Asduklan Afṛansi, yernu d win ay d aɣmis aydeg yella yettaru-d daɣ Abdelkader Hadj Ali, yellan d ameɣnas azzayri n yizerfan n yimahalen yernu mgal usehres.

Deg tgara n Umgaru Anmaḍal Wis Sin, Ho Chi Minh yella d imḍebber n yimenɣi aɣerfan ay yessawḍen ɣer tlalit n Tegrawla Tamegdayt n Vietnam ass n 2 Ctembeṛ 1945, deffir teswatut n uwdag afṛansi, yernu d Ho Chi Minh ay yeqqlen d aselway n tegduda-a.

D acu kan, Fṛansa turem ad d-terr Vietnam ɣer ddaw uzaglu-nnes yernu d aya ay yeǧǧan Ivietnamiyen ad zbun azbu ijehden s temsetlelt n umaḍal akken ma yella.

S laman ay iga uɣref avietnami deg Ho Chi Minh, tessaweḍ tmurt-a, deffir 9 n yiseggasen n umennuɣ mgal tuqqla n Fṛansa, akken ad ternu taneggarut-a deg tmiwta tamezruyant n Dien Bien Phu yernu d aya ay yessawḍen Ifṛansiyen ad ffɣen seg Vietnam.

Ho Chi Minh yella iɛewwel ad yesdukkel aɣref avietnami, dɣa s waya ay yennuɣ, seg 1954 d asawen mgal Yiwanaken Yeddukklen deg yiwen n umgaru aydeg iɣallen imarikaniyen ttwameḥqen i tikkelt tamezwarut deg umezruy.

Amgaur ay d-yellan gar Vietnam d Yiwanaken Yeddukklen d win ay ijerḥen i lebda aserhu d tsellat n Washington ay igan tijrimin d timaglayin deg Vietnam.

Yemmut Ho Chi Ming deg 1969 ɣer 79 n yiseggasen, yernu yeǧǧa-d i uɣref-nnes d talsa akken ma tella taṣekka d tanesbaɣurt aydeg d-iweṣṣa ɣef uqader n yimenzayen inelɣiyen d tdukli, taɣdemt, tagadda, tamsetlelt, tammidwa, amsegzu, anmireg d tegmat gar yiɣerfan.

 

Last modified on Ljemɛa, 22 Mayu 2020 13:33
Amulli n tlalit n Ho Chi Minh: Amekti n tmeddurt n baba-s n tegrawla tavietnamit
  Yeffeɣ-d ass n : Laṛebɛa, 20 Mayu 2020 12:32     Taggayt : AMAḌAL     Ɣran-t : 56 n tikkal   Bḍu