Ɣezza: Yerna umḍan n yinemmiten ay tenɣa Isṛayil ɣer 61

Yeffeɣ-d ass n : Ttlata, 15 Mayu 2018 15:32   Ɣran-t : 36 n tikkal
Ɣezza: Yerna umḍan n yinemmiten ay tenɣa Isṛayil ɣer 61

ƔEZZA – Yewweḍ umḍan n Yifalesṭiniyen ay nɣan yiserdasen isṛayiliyen deg Ɣezza ɣer 61 ass n usinas (ttlata), ɣef leḥsab n uneɣlaf afalesṭini n tdawsa ay d-ixebbren dakken yemmut yiwen n ugrud s lejruḥ-nnes n wass n uynas (letniyen), mi t-wten yiserdasen isṛayiliyen s rrṣaṣ deg tmeskanin ay d-yellan mgal usgiǧǧi n tmahelt n Yiwanaken Yeddukklen ɣer Lquds yettwawedgen.

Ɣef leḥsab n unemyaru n tnegga tafalesṭinit n Wafa, ay yellan deg usbiṭar n Al-Shifa deg temdint n Lquds, aqcic-a ay yemmuten d Adel Ibrahim, yesɛa 16 n yiseggasen yernu yettwet s rrṣaṣ isṛayili ass n uynas (letniyen).

D wa ay d amdan wis sin ay yemmuten ass n usinas (ttlata) deffir ma yemmut yiwen n ulufan afalesṭini seg wurrig n yimeṭṭawen, ɣef wakken ay d-yenna uɣlif afalesṭini n tdawsa.

Alufan-a d taqcict isem-nnes Leila al-Ghandour yernu tesɛa 8 kan n wayyuren, ɣef wakken ay d-yenna uɣbalu-a.

« Yewweḍ umḍan n yimeɣrusen ay yeɣlin iḍelli (aynas) ɣer 61 deg tesfift n Ɣezza », ɣef wakken ay d-tenna tnegga-a tafalesṭinit ay d-yernan dakken aṭas n yimejraḥ s rrṣaṣ ay d-yellan daɣ deg tmeskanin ay ssuddsen Yifalesṭiniyen ass n usinas (ttlata) tanezzayt deg temdint n Lxalil.

D timerwin n yigiman n Yifalesṭiniyen n Ɣezza ay igan timeskanin, ass n uynas (letniyen) mgal uẓẓunẓu n tmahelt tamarikanit deg Lquds.

Akken ad meḥqen tameskant-a, qersen yiserdasen isṛayiliyen s rrṣaṣ n tidet mgal yinmeskanen-nni yernu nɣan 59 n yimdanen seg-sen, dɣa d aya ay d-yesnekren assiẓer d agraɣlan mgal « tnegzart-a » ay la iḍerrun s leǧheṛ.

Last modified on Ttlata, 15 Mayu 2018 15:38
Ɣezza: Yerna umḍan n yinemmiten ay tenɣa Isṛayil ɣer 61
  Yeffeɣ-d ass n : Ttlata, 15 Mayu 2018 15:32     Taggayt : AMAḌAL     Ɣran-t : 36 n tikkal   Bḍu