Assiẓer n Ahed Tamimi: Tger-d Tgelda Yeddukklen tiɣri i uqader n yizerfan n yigerdan ifalesṭiniyen

Yeffeɣ-d ass n : Ssebt, 24 Meɣres 2018 15:11   Ɣran-t : 260 n tikkal
Assiẓer n Ahed Tamimi: Tger-d Tgelda Yeddukklen tiɣri i uqader n yizerfan n yigerdan ifalesṭiniyen

LONDON – Iger-d unabaḍ abriṭani tiɣri, ass n ljemɛa, i uqader n yizerfan n yigerdan ifalesṭiniyen ay ḥebsen yiɣallen n wewdag isṛayili, yernu iḥettet-d ɣef uḥuddu n Yifalesṭiniyen uḍɛifen.

Deffir ma tettwassaẓer teqcict tafalesṭinit Ahed Tamimi, ass n laṛebɛa, ɣer 8 n wayyuren n lḥebs, yenna-d uneɣlaf abriṭani ay d-yelhan s Wegmuḍ Alemmas, Alistair Burt, deg yiwen n welɣu dakken « asekker n yizerfan ifalesṭiniyen deg tkurmutin tiserdasanin tisṛayiliyin yettɣimi-d d tuzwirt n yizerfan n wemdan ɣer Tgelda Yeddukklen ».

« Ad nkemmel ad d-neggar tiɣri i Isṛayil akken ad tesselhu tisemras-nnes s uqader n usaḍuf d lwajeb agraɣlan », ɣef wakken ay d-yenna, am wakken ay d-yerna dakken yessefk ad ḍemnen Yisṛayiliyen ammesten n yemdanen uḍɛifen ay yellan ddaw leɛnaya-nsen.

I wesmekti, Ahed Tamimi ay yesɛan 17 n yiseggasen, tettwabeẓ ass n 19 Dujembepr 2017 yernu tettwatthem s tyita d wejraḥ n yiserdasen isṛayiliyen deffir ma ssuffɣen-d taẓrawit deg yiẓeḍwan inmettiyen aydeg tella tettdemmir sin n yiserdasen isṛayiliyen ay yellan deg yeɣrem-nnes n Nabi Saleh akken ur ten-tettaǧǧa ara ad adfen ɣer wexxam n yimawlan-nnes.

Ɣef leḥsab n Amnesty International, d timaḍ n yigerdan ifalesṭiniyen ay yettwacaṛaɛen deg tnefra tiserdasanin tisṛayiliyin.

Twekked-d daɣ tuddsa-a tarnabaḍt dakken azal n 350 n yigerdan ifalesṭiniyen ay yellan deg tkurmutin d wammasen isṛayiliyen n weskurmu.

 

 

Assiẓer n Ahed Tamimi: Tger-d Tgelda Yeddukklen tiɣri i uqader n yizerfan n yigerdan ifalesṭiniyen
  Yeffeɣ-d ass n : Ssebt, 24 Meɣres 2018 15:11     Taggayt : AMAḌAL     Ɣran-t : 260 n tikkal   Bḍu