Takriḍt mgal Yinselmen deg Sri Lanka: yeqqel-d ccwal

Yeffeɣ-d ass n : Laṛebɛa, 07 Meɣres 2018 16:12   Ɣran-t : 37 n tikkal
Takriḍt mgal Yinselmen deg Sri Lanka: yeqqel-d ccwal

COLOMBO – Llant-d tɣewwaɣin timaynutin ass n laṛebɛa deg tlemmast n Sri Lanka, ula ma iduba isrilankiyen sɣerten-d addad n tutribin i tallit n 10 n wussan deffir yiwet n tayyugt n tekriḍt ay d-yellan mgal tedrest tineslemt, ɣef wakken ay d-tenna temsulta.

Ma ulac, jerḥen 3 n yemsulta deg yimenɣi ay d-yellan gar-asen d yenmeskanen deg Menikhinna, deg temnaḍt tamerrant d tegtitnit n Kandy, anda ay yenker ccwal ay yeglan s tmeddurt n sin n yemdanen d ussedrem n wazal n 100 n tnezduɣin d tḥuna deg wussan-a ineggura, ɣef wakken ay d-yenna Ruwan Gunasekera, amutlay n temsulta.

7 n yemdanen ay yettwabẓen ass n laṛebɛa deffir ma rekḍen agdal n tuffɣa ay d-yettwasɣerten ass n letniyen. Imdanen-a ttwattehmen s ussenker n ccwal deg temnaḍt-a ay yettwassnen s tneẓẓa-nnes n watay d yisemlen-nnes ibudiyen.

Ass n laṛebɛa, iɣerbazen n temnaḍt n Kandy (115 n yikilumitren deg wegmuḍ n Colombo) llan mazal-iten medlen.

Yeɣtes unabaḍ ad d-yesseɣret addad n tutribin i tikkelt tamezwarut deg 7 n yiseggasen imi ur tessaweḍ ara temsulta ad teḥbes takriḍt deg temnaḍt-a, dɣa ɣef waya ay ttwaferqen yiserdasen d yiɣallen uzzigen akken ad d-rren lɛafya.

Tebda tekriḍt-a deg tgara n yimalas yezrin, mi yemmut yiwen n Usengali abudi deffir ma wten-t lɣaci.

Isengaliyen (amur ameqran deg-sen d ibudiyen) ttgensisen-d 3 n yimuren ɣef 4 seg 21-nni n yimelyunen n yimezdaɣen ay yeddren deg Sri Lanka. Inselmen ttgensisen-d kan 10% seg yimezdaɣen n tegzirt-a, ma d Itamuliyen, amur ameqran deg-sen d ihendusiyen yernu ttgensisen-d 18%.

Sri Lanka simal la tettnerni deg-s tiḍḍurfa tabudit ay la smendagen kra n yimunaken imeḍḍurfa.

Addad n tutribin yettakf i yiduba izerfan meɣɣren ugar i wefraq n yiɣallen, abbaẓ n yimeckuken d weḥbas-nsen i tallit ɣezzifen. 

 

 

Last modified on Laṛebɛa, 07 Meɣres 2018 16:14
Takriḍt mgal Yinselmen deg Sri Lanka: yeqqel-d ccwal
  Yeffeɣ-d ass n : Laṛebɛa, 07 Meɣres 2018 16:12     Taggayt : AMAḌAL     Ɣran-t : 37 n tikkal   Bḍu