Inṭagen isṛayilen ɣef Dimecq: tiɣri i uqader n tnaya n Surya

Yeffeɣ-d ass n : Letniyen, 12 Fuṛaṛ 2018 12:08   Ɣran-t : 46 n tikkal
Inṭagen isṛayilen ɣef Dimecq: tiɣri i uqader n tnaya n Surya

LEZZAYER TAMANEƔT – Akken kan ay tetɛedda Isṛayil ɣef Dimecq, ass n ssebt, llant-d tsedmirin ijehden i lmend n uqader n tnaya n Surya d tummda n wakal n tmurt-a, ladɣa imi awanak asuri mazal yettkemmil yettnaɣ mgal tegrawin tiremmaɣin akken ad d-yessukkes iman-nnes seg tezɣint taɣellisant ay t-iḥuzan seg 2011.

 Deffir wesnerni-a ay tesnerna Isṛayil ccwal deg Surya, tenna-d Rrus dakken tecɣeb-itt temsal yernu tger-d tiɣri i wakk idisan ay terza temsalt akken « ad ḥekmen iman-nsen » yernu ad ssinfen i s kra n tigrawt ay izemren ad ternu ad tessewɛeṛ tagnit.

 « Nettwali dakken yessefk ad tettwaqader tnaya d tummda n wakal asuri s tamekt tummidt », ɣef wakken ay d-yenna weɣlif arusi n yiweẓla n wezɣar deg yiwen n welɣu.

 Yerna-d daɣ weɣlif-a dakken assersi n yiserdasen irusiyen yellan deg Surya deg umihi maci d ayen ara yettwaqeblen yernu iserdasen-a llan din s uneɛruḍ n unabaḍ uzrif n Surya i uttekki deg yimenɣi mgal tremɣa.

 Ma d amussu alubnani n Ḥizbullah yesteṛḥeb s ubeddu n « tallit tasnuddsant tamaynut » aydeg Dimecq terra-d tiyita i yenṭagen ineggura n Isṛayil deg Surya yernu tesseɣli-d asafag isṛayili n ṣṣenf n F-16.

 Asafag-a isṛayili yeɣli-d deffir ma twet-it temḥaddit tasurit, yernu i lmend n waya, yeckeṛ-d umussu n Ḥizbullah takayt n tredsa tasurit ay iqublen s tebɣest isafagen isṛayiliyen yernu tessaweḍ ad d-tesseɣli asafag n F-16.

 Ma d asemtar n Wemnir Anafella n Iṛan deg yiweẓla igraɣlanen, Ali Akbar Velayati, iwekked-d dakken aɣref asuri la yettnaɣ mgal tremɣa yernu tessaweḍ ad ternu anguz ay tt-iḥukṛen akken ad teɣli, dɣa s waya, Iṛan werǧin ad teqbel akemmel n wetɛeddi isṛayili ɣef Surya.

 

 

Inṭagen isṛayilen ɣef Dimecq: tiɣri i uqader n tnaya n Surya
  Yeffeɣ-d ass n : Letniyen, 12 Fuṛaṛ 2018 12:08     Taggayt : AMAḌAL     Ɣran-t : 46 n tikkal   Bḍu