Muriṭanya: sbedden-d aẓeḍḍa n temdinin timɣarbiyin

Yeffeɣ-d ass n : Lexmis, 08 Fuṛaṛ 2018 14:34   Ɣran-t : 115 n tikkal
Muriṭanya: sbedden-d aẓeḍḍa n temdinin timɣarbiyin

NWAKCUṬ – Yettwassebded-d uẓeḍḍa n temdinin timɣarbiyin, ass n laṛebɛa deg Nwakcuṭ (Muriṭanya), i lmend n ussemɣer n yegli n wenmireg d wesdukkel n wussisen i ussiweḍ ɣer unnegmu ay ssefrayen ad t-awḍen deg yidisan yemgerraden deg temdinin-a.

Iselwayen d yimesɣiwanin n tmunaɣ timɣarbiyin wekkden-d, deg yiwet n temlilit ay d-yellan deg Nwakcuṭ, deg yijifeṛ n « Usarag Amɣarbi Agraɣlan ɣef Tesnulzuzt n Wakal », aydeg yettekka uselway n tɣiwant n Lezzayer Talemmast, Abdelhakim Bettache, dakken assebded n uẓeḍḍa-a n temdinin timɣarbiyin iswi-nnes d asmal n temdinin-a s ussemɣer n yeglan n wenmireg, asdukkel n wussisen d ussejhed n ussemyuddes i lmend n ussekmem n unnegmu amdinan ara d-iḥazen tadamsa, timetti, tawennaḍt, idles d tɣellist.

Imesɣiwanen n twilayt n Lezzayer, Nwackuṭ, Tunes, Ṭrables d Tgemmi Tamellalt gren-d daɣ tiɣri, deg welɣu-nsen imsebded, i temdinin niḍen akken ad ttekkint deg uẓeḍḍa-a ara imahlen i lmend n wesmal n temdint d usselhu n tmeddurt deg-s, yernu ad mahlen ddukkli akken ad ssiwḍen ɣer wayen ay ssaramen yernu ad qablen icqirrwen ay ten-yerzan.

Deg tinawt ay d-yeɣra umaru amatu n Tdukli n Lmeɣreb Aɛṛab, Tayeb Bekouche, i lmend n waya, yeckeṛ-d assebded n uẓeḍḍa-a amɣarbi ay d-yenna dakken d asurif deg lebni n Lmeɣreb, ladɣa imi tadukli-a txuṣṣ deg wayen yerzan assermed n tsuda-nnes, ladɣa iẓeḍwan n tmetti taɣarimt.

Ɣef leḥsab n uselway n tɣiwant n Lezzayer Talemmast, Abdelhakim Bettache, assebded n uẓeḍḍa n temdinin timɣarbiyin yella-d d agummu n yimahilen n usarag agraɣlan amɣarbi n Nwakcuṭ ɣef tesnulzuzt n wakal deg temdinin n Lmeɣreb, yernu yenna-d dakken ur yettɛeḍḍil ara ad yemciweṛ d umur ameqran seg yimesɣiwanen akken ad ttekkin deg uẓeḍḍa-a yernu ad ḥedṛen deg temlilit-nnes ay d-yetteddun.

Last modified on Laṛebɛa, 14 Fuṛaṛ 2018 17:57
Muriṭanya: sbedden-d aẓeḍḍa n temdinin timɣarbiyin
  Yeffeɣ-d ass n : Lexmis, 08 Fuṛaṛ 2018 14:34     Taggayt : AMAḌAL     Ɣran-t : 115 n tikkal   Bḍu