Meṛṛuk/Amussu n Ḥiṛak: tuddsa n Yinemyura War Tilisa yecɣeb-itt weḥbas n yiwen n uneɣmas

Yeffeɣ-d ass n : Lḥedd, 04 Fuṛaṛ 2018 11:27   Ɣran-t : 168 n tikkal

PARIS – Tessenfali-d tuddsa n Yinemyura War Tilisa, ass n ssebt, « acɣab-nnes alqayan » ɣef yiwen n uneɣmas ay tessaẓer teɣdemt tameṛṛukit ɣef lǧal n tduli ay idel tanekra n Rrif, yernu tessuter tuddsa-a ad d-yettwaslelli uneɣmas-a war leɛḍil.

 

Aneɣmas Abdelkabir al-Horr, d imsebded n wesmel n usselɣu amesmatu n Rassdmaroc, ssaẓren-t, ass n lexmis, ɣer 4 n yiseggasen n tkurmut yettwasensen deg wexxam n truẓi n ccṛeɛ n Rrbaṭ, deg wakud aydeg 4 n yineɣmasen niḍen mazal-iten deg ccṛeɛ deffir ma ssuffɣen-d « tilɣa tuffirin » ɣef yiwet n temsalt n wesgufsu ay d-yellan deg Usenduq Ameṛṛuki n Testaɣt, ɣef wakken ay d-yenna yiwen n welɣu n usanay-a ay yettḍafaren tilelli n tɣemsa deg umaḍal.

 

Yebda-d ucaṛeɛ n Abdelkabir al-Horr seg wayyur n Ɣuct n 2017 s ttehma n weckaṛ n tremɣa, aḥettet i tmeskanin yettwagedlen deg temnaḍt n Rrif d rregmat i yimeẓla n tɣellist, ɣef wakken ay d-tenna tuddsa n Yinemyura War Tilisa, d acu kan, yenna-d ubugaṭu-nnes dakken taɣdemt tetthem-it s ussersi n yiznan ɣef umussu n Ḥiṛak deg yiwen n usebter n Facebook deg wakud aydeg netta, ur la yessefrak ara asebter-a n Facebook seg useggas n 2016. Ɣef leḥsab n ubugaṭu-nnes, ccṛeɛ yugi assuter n ussefqed atwilan.

 

Nnig waya, yebda, ass n 25 Yennayer, ccṛeɛ n sin n yineɣmawen, yiwen deg-sen yettmahal i uyallas n Al-Massae, ma d wayeḍ yettmahal i uyallas n Akhbar Al-Yaoum, am wakken ay ttwacaṛɛen daɣ yineɣmasen ay yettmahalen i wesmel n usselɣu n Aljarida24.

 

« La ttwacaṛaɛen akk imi ay d-ssersen tukkisin n yiwet n tsestant tawamnit d tuffirt ɣef ccekk ay d-yellan deg yiwet n temsalt n Usenduq Ameṛṛuki n Testaɣin », ɣef wakken ay d-tenna tuddsa n Inemyura War Tilisa, am wakken ay d-terna dakken ineɣmasen-a zemren ad ten-ssiẓren ɣer gar useggas d 5 n yiseggasen n tkurmut, yernu ad asen-fken tifgurin n gar 1.000 d 10.000 n yidiṛehmen (gar 100 d 1000 n wuṛuten) ɣef ussuffeɣ n wuguren imsaduren d « tkafust ». Yettwawexxer ccṛeɛ-nsen arma d ass n 8 Meɣres.

 

I wesmekti, Meṛṛuk tusa-d deg wemkan wis 133 gar 180 deg usettef anmaḍal n tlelli n tɣemsa n 2017.

 

Ɣef leḥsab n Inemyura War Tilisa, iduba imeṛṛukiyen la ḥeṛṛsen ttawilat imeṛṛukiyen izaruganen n yisalan ama seg yidis asertan neɣ seg yidis adamsan akken ad ten-rẓen ifadden ur d-lehhun ara s temsal tinafriyin, yernu ula d ineɣmasen iwerdaniyen ur sliken ara seg waya.

 

Meṛṛuk/Amussu n Ḥiṛak: tuddsa n Yinemyura War Tilisa yecɣeb-itt weḥbas n yiwen n uneɣmas
  Yeffeɣ-d ass n : Lḥedd, 04 Fuṛaṛ 2018 11:27     Taggayt : AMAḌAL     Ɣran-t : 168 n tikkal   Bḍu