LDZAYER TAMANEƔT – Terbeḥ teɣlamt taɣelnawt tadzayrit n ubadminṭun talɣuɣa n Tefriqt deg usettef amatu (aterrasan) s 4 n tzalɣiwin (snat n wureɣ, yiwet n weẓref d yiwet n webṛunz) deg tgara n telɣuɣa-a ass n lḥedd tameddit, deg tzeɣɣa n Harcha-Hacene (Ldzayer Tamaneɣt).
TUNES – Timcirfugin tizzayriyin n NRBBA Lberǧ Buɛririǧ rebḥen taɣlamt Seep n Ɛemman s ugmuḍ n 18-25, 25-17, 22-25, 25-20, 15-13, deg temlilit almend n wass 1 n tegrawt D n Telɣuɣa taɛrabt n yiqusisen, i yuraren ass n ssebt deg Tunes.
LDZAYER TAMANEƔT – Yuweḍ leɛfu n Ṛebbi umurar aqbur d wesleɣmay n teɣlamt taɣelnawt n utinis, Abdesslam Mahmoudi ay yettwassnen s yisem n « wemɣar », yernu yella-d waya deg yiḍ n wass n ljemɛa d ssebt deg Ldzayer, ɣer 83 n yiseggasen ɣef wakken ay d-nnan wid ay as-yettilin i Tnegga n Yisalan n Ldzayer.
LEZZAYER TAMANAƔT – Aselway n tfidiṛalit tazzayrit Ubadminṭun (FABa) Messaoud Amine Zoubiri yenna d akken Lezzayer tuklal azwel-agi n telɣuɣt n tefṛiqt di ṣṣenf n teɣlamin, ay terbaḥ di temlilit n taggara ass n laxmis di tzeqqa Harcha-Hacène zdat n Nigeria (3-2).
LDZAYER TAMANEƔT – D taɣlamt n tsednan n Maurice ay d-irebḥen tazalɣi n wureɣ s tmerniwt n teɣlamt tanijiryant (3 ɣer 0) deg tgarant n teɣlamin deg Telɣuɣa n Tefriqt n Ubadminṭun ay d-yellan, ass n lexmis, deg tzeɣɣa n Harcha-Hacene n Ldzayer Tamaneɣt.
LDZAYER TAMANEƔT, 14 Fuṛaṛ 2018 – Ad turar teɣlamt tadzayrit n tcirḍart n ddaw 21 n yiseggasen timlilit tammidwant mgal teɣlamt taɣelanwt n Falesṭin ass n 27 Fuṛaṛ deg Usarir n 5 Yulyu (Ldzayer Tamaneɣt), ɣef wakken ay d-tenna, ass n laṛebɛa, Tfidiṛalit Tadzayrit n Tcirḍart. Timlilit-a tammidwant tella-d deg ukatar n ussewjed n Yidzayriyen akken ad ttekkin deg yisihaṛen unṣiben ay d-yetteddun am Wuraren Igrakalmanen n 2018 deg Tarragona (Spenyul) deg unebdu ay d-yetteddun, d Wuraren Ulimpiyen n 2020. I lmend n temlilit-a tammidwant, ad teg teɣlamt taɣelnawt, ddaw tmehla n Boualem Charef, tannant n ussewjed gar 24 d 28 Fuṛaṛ. Umuɣ n yimuraren idzayriyen umi d-ɣran i temlilit-a d wemkan n tannant ad d-xebbren fell-as sakkin, ɣef wakken ay d-tenna Tfidiṛalit. 
WEHRAN – Ad yili yiwen n umyiger agrakalan n tcirfust deg tzeqqa tulambit n Warziw (Wehran) seg 18 ɣer 21 furar, i aɣ-d-nnan ass n ttlata yimsuddsen.

Timliliyin i wesmal n waddalen n tnaka

Letniyen, 12 Fuṛaṛ 2018 12:19
TIHERT – Yenna-d uneɣlaf n tmeḍrit d waddal, El Hadi Ould Ali, ass n lḥedd deg Tihert, dakken ad d-ilint temliliyin n ussemyuddes d yimeggiyen yemgerraden i wesmal d weḍfar n waddalen n tnaka. Deg yiwet n tseɣrut i tɣemsa, deg yijifeṛ n terzi-nnes n ussefqed ɣef twilayt n Tihert, iwekked-d uneɣlaf dakken aɣlif-nnes yettakf azal meɣɣren i waddalen n tnaka s uqader n lewṣayat n uselway n tegduda, Mass Abdelaziz Bouteflika, yernu la yettmahal weɣlif i lmend n wesmal d wesnegmu n waddalen-a. I lmend nw aya, yenna-d dakken ad d-ilint temliliyin, deg wussan ay d-yetteddun, ama deg weɣmif, ama deg twilayt. Yenna-d daɣ El Hadi Ould Ali dakken aɣlif-nnes yedhel izwuren n yilemẓiyen d tiddukliwin ay yettmahalen deg wenrar-a am wakken ay d-iger tiɣri i yilemẓiyen ad sseddun tiktiwin n wemsuɣal aɣelnaw yernu ad ḥudden tadukli n weɣref d uwanak, yernu iwekked-d dakken iḥulfa, s wemyager-nnes d yilemẓiyen n Tihert, dakken ineggura-a ḍḍfen mliḥ deg tmurt d tdukli-nnes.
 TIGEMMI TAMELLALT – Terbeḥ-d teɣlamt tadzayrit n wesnasɣel (ilemẓiyen d tedɣert) 12 n tzalɣiwin (4 n wureɣ, 3 n weẓref d 5 n webṛunz) deg Telɣuɣa n Tefriqt n Wesnasɣel deg Wemnenniḍ ay ifuken ass n ssebt deg Tgemmi Tamellalt, deg Meṛṛuk. Ureɣ rebḥen-t-id Yacine Chalal (yiwet) d Youcef Boukhari (3 n tzalɣiwin deg tmezzugin yemgerraden). S yegmaḍ-a igerrzen, ad yettekki Yacine Chalal deg Telɣuɣa n Umaḍal ara d-yilin gar 28 Fuṛaṛ d 4 Meɣres deg Tmura n Waddal d Teqbuct n Umaḍal ara d-yilin deg Wamber deg Fṛansa, ɣer yidis n Zineddine Tahri. Seg yidis-nnes, Boukhari ur ixeyyeb ara akk imasayen n Tfidiṛalit Tadzayrit n Wesnasɣel d wesleɣmay-nnes Abdelbasset Hannachi. Aqcic-a n Wad Ttlilat (Wehṛan) yerbeḥ-d daɣ snat n tzalɣiwin n weẓref deg temsizzelt n sin n yikilumitren n taggayt n yilemẓiyen. Inaddalen Ayoub Kerar, Mohamed Bouzidi d El-Khacib Sassane rebḥen-d tizalɣiwin n weẓref deg teɣlamt n tedɣert. Tizalɣiwin n webṛunz rebḥen-tent Mohamed-Amine Nhari, El-Khacib Sassane, taɣlamt n tazzla s uɣiwel n taggayt n yilemẓiyen (Youcef Boukhari, Abdeldjalil Djilali d Sedik Benganif), taɣlamt n wemseḍfar (Youcef Boukhari, Abdeldjalil Djilali d Sedik Benganif) d teɣlamt n wemseḍfar n tedɣert (Smail Lallouchi, Abderahmane Karim Hadjbouzid, El-Khacib Sassane d Mohamed Bouzidi). 11 n yimazzalen idzayriyen ay yettekkan deg Telɣuɣa n Tefriqt deg Wemnenniḍ ay d-yellan deg Tgemmi Tamellalt (deg Meṛṛuk) ddaw tmehla n wesleɣmay aɣelnaw Hannachi.
LEZZAYER TAMANEƔT – Tameḍrit Taddalant n Leqbayel, ay irebḥen talɣuɣa n Lezzayer 14 n tikkal, teqqel deg tegnit iweɛṛen aydeg ay tezmer ad teɣli ɣer Temɣunt Tis Snat ladɣa imi ay la tettkemmil txeṣṣer timliliyin. Ass n ssebt, d tikkelt tis 12 aydeg ara turar timlilit war rrbeḥ, imi ay tfuk timlilit-nnes d NA Ḥusin Day s 1 ɣer 1 deg ukatar n wass n 19 n wurar deg ukatar n telɣuɣa n Temɣunt 1ut n tcirḍart.