Menu principal

Menu principal

Lewṣayat i usmal n yigzumen n temguri, tanezzut d tkerrazt

Yeffeɣ-d ass n : Letniyen, 01 Yunyu 2020 11:39   Ɣran-t : 53 n tikkal
Lewṣayat i usmal n yigzumen n temguri, tanezzut d tkerrazt

LEZZAYER TAMANEƔT – Iweṣṣa uselway n tegduda, Abdelmadjid Tebboune, ass n usamas, deg temlilit n useqqamu n yineɣlafen, akken ad yesmel unabaḍ igzumen n temgrui, tanezzut d tkerrazt, ladɣa deg tegnit-a n tkaɣreft n unfafad bu uqacuc.

Deg wawal-nnes deffir uneskin n uneɣlaf n temguri ɣef ufaki n usewjed n uɣawas n usduqqes n temguri taɣelnawt ama deg tallit n tezɣent n unfafad bu uqacuc, ama deffir-s, iwekked-d uselway n tegduda ɣef usegriwel n ugzum amguran akken « ad fakent tsemras tirnelɣiyin yettwassnen », am wakken ay d-yesmekti dakken iswi n usduqqes adamsan d asenqes n tfatuṛt n waǧaw d usedwet n yisraten n wulzuz aɣelnaw, ɣef wakken ay d-yenna ulɣu n useqqamu n yineɣlafen.

Aselway Tebboune iweṣṣa aneɣlaf n temguri ad d-iheyyi asenfar n usaḍuf-akatar n waɣad amguran, am wakken ay d-iḥettet ɣef wuddun n tbuɣar tinaɣzanin tiɣelnawin s umyalel d teẓdarin tiɣelnawin d twerdaniyin.

Yenna-d daɣ uselway n tegduda dakken iḥar lḥal ad d-yili useqɛed n ufaylu n wakal amguran s useɣnew tneggiwin i usefrek n wakal-a deg yiɣlifen n temguri, takerrazt d useqɛed n temdinin. Seg yidis niḍen, yumeṛ uselway akken ad yettwagdel waǧaw n yimseddayen imsemḍas.

I lmend n waya, iweṣṣa uselway Tebboune aneɣlaf n temguri akken ad d-iheyyi « ahil d utrib ara yettwaslekmen war leɛḍil i ukemmel n ufares d umezgi d yisaḍufen iqburen seg leɛḍil n usmidden n yisaḍufen imaynuten ».

Iweṣṣa daɣ aneɣlaf n temguri d win n ugensu ad fken ugar n wazal i wasunen inɣiwanen n urmid i usebɣes n useɣnew n temras.

Seg tama niḍen, aselway Tebboune iwekkel ineɣlafen n temguri d tnezzut akken ad d-heyyin, s usemyuddes d Texxamt Tazzayrit n Tnezzut d Temguri d texxamin timnaḍanin ddaw leɛnaya n uneɣlaf amenzu, « tazrawt tutribt ɣef tegnit n yinḍen d yimsenza imecṭuḥen ay tḥuza tezɣent n tkaɣreft n unfafad bu uqacuc d usumer n tsemsedda n tallalt ».

 

Lewṣayat i usmal n yigzumen n temguri, tanezzut d tkerrazt
  Yeffeɣ-d ass n : Letniyen, 01 Yunyu 2020 11:39     Taggayt : TADAMSA     Ɣran-t : 53 n tikkal   Bḍu