Anagraw n turagin n waǧaw yessager-d 5,4 n yimelyaṛen n yidulaṛen deg sin n yiseggasen ineggura

Yeffeɣ-d ass n : Ljemɛa, 16 Fuṛaṛ 2018 13:37   Ɣran-t : 103 n tikkal
Anagraw n turagin n waǧaw yessager-d 5,4 n yimelyaṛen n yidulaṛen deg sin n yiseggasen ineggura

LDZAYER TAMANEƔT – Iwekked-d uneɣlaf n tnezzut, Mohamed Benmeradi, ass n lexmis deg Ldzayer Tamaneɣt, dakken anagraw n turagin n waǧaw ay yeḍfer unabaḍ deg sin n yiseggasen ineggura deg ukatar n yisurifen n usseɣyed n tnezzut tuffiɣt yeǧǧa Ldzayer ad d-tessiger 5,4 n yimelyaṛen n yidulaṛen.

Deg 2016, tessager-d Ldzayer 3 n yimelyaṛen n yidulaṛen deg ukatar n unagraw-a, deg wakud aydeg deg 2017, tessager-d 2,4 n yimelyaṛen n yidulaṛen, ɣef wakken ay d-yenna Mass Benmeradi mi d-yerra ɣef tuttriwin tinimiyin n Useqqamu n Weɣlan.

Asseqdec n unagraw n turagin iswi-nnes d assizdeg n tnezzut tuffiɣt d weḥraz n ufares aɣelnaw, d acu kan, yernu yella naqal yettwalesses ɣer yifarisen ay yesɛan lateṛ ɣef tewliwla tanezzant (asiman, ubrin n ubiṭun d yemseddayen), uqbel ma iḥuza-d ifarisen n ussuder n ulameɣ.

D acu kan, ɣef wakken ay d-yenna uneɣlaf, anagraw-a banent-d daɣ tlisa-nnes yernu yenna-d dakken anabaḍ iheyya-d anagraw n wessmad akken ad ikemmel asseɣyed n tnezzut tuffiɣt d weḥraz n ufares aɣelnaw seg tmazga n yifarisen ay d-yettwaǧwen. Anagraw-a d win aydeg yettwassigel waǧaw n 851 n yifarisen iwejden yernu d ifarisen iɣelnawen ara yettwasqedcen deg wemkan-nsen imi ay ttwaɣrafen deg Ldzayer s tesmektiwin ayyes ay ten-yeḥwaj wulzuz aɣelnaw, am wakken ay yessefra unagraw-a ad yernu deg tewsi n tedwant yerzan 129 n yifarisen iwejden.

Aɣlif n tnezzut yettmahal s wemyalel d yeɣlifen niḍen ay yerza wala, yernu wi d aɣlif n tedrimt, win n tkerrazt d win n teẓwert. Amyalel gar yeɣlifen-a yettili-d s webrid n yiwet n tesmilt n wemciweṛ ay d-yelhan s ussefrek d weḍfar n wakaten n uḥezzeb yernu ccɣel-nsen agejdan d assekyed n yissutren n ummesten ay d-yettekken sɣur teṛmisin tidzayriyin (infarasen) d ussumer n wakaten n uḥezzeb ay yessefken i ummesten n ufaris aɣelnaw. 

 

 

Last modified on Lḥedd, 18 Fuṛaṛ 2018 14:57
Anagraw n turagin n waǧaw yessager-d 5,4 n yimelyaṛen n yidulaṛen deg sin n yiseggasen ineggura
  Yeffeɣ-d ass n : Ljemɛa, 16 Fuṛaṛ 2018 13:37     Taggayt : TADAMSA     Ɣran-t : 103 n tikkal   Bḍu