Arẓam n Tmesrit Tagraɣlant Tis 5 n Umesni d Tlujistit

Yeffeɣ-d ass n : Ttlata, 13 Fuṛaṛ 2018 12:33   Ɣran-t : 52 n tikkal
Arẓam n Tmesrit Tagraɣlant Tis 5 n Umesni d Tlujistit

 LEZZAYER TAMANEƔT, 12 Fuṛaṛ 2018 – Yefka lameṛ uneɣlaf n yimahilen inagduden d umesni, Abdelghani Zaalane, ass n letniyen deg Lezzayer, i werẓam n teẓrigt tis 5 n Tmesrit Tagraɣlant n Umesni d Tlujistit, « Algeria Infrastructure 2018 ».

 Tadyant-a tadamsant ad d-tili gar 12 d 14 Fuṛaṛ deg Leqṣer n Tzikknin (Azumbi n Yilel) yernu ad ḥedṛen deg-s azal n 100 n yemzikknen iɣelnawen d yiwerdaniyen ay d-yusan seg Tmura n Wadda (tinebgit n userhu), Tafriqt n Wenẓul, Ccinwa, Fṛansa d Sswis.

 Ad ttekkint daɣ teṛmisin n umesni am Teṛmist n Umiṭru n Lezzayer, Taṛmist Taɣelnawt n Umesni s Webrid n Wuzzal, Taṛmist n Unafag n Lezzayer Tamaneɣt, Aɣsur Anagdud n Umesni Amdinan d Udumdinan (ETUSA) d teṛmisin n yisugan n Ɣazawat, Mestɣanem, Wehṛan d Tnes.

 Deg yiwen wemyager d tɣemsa deffir werẓam n tmesrit-a, ɣer yidis n tenmahelt n Tmura n Wadda deg Lezzayer, yenna-d uneɣlaf dakken amesni d tlujistit d igzumen yesɛan azal meɣɣren yernu tturaren dduṛ deg tdinamit tadamsant s ussejhed n wembaddel anezzan.

 Asnegmu n umesni d win ay yettekkan deg usselhu n usettef n Lezzayer deg wenrar n tlujistit yernu yella-d waya s kra n yisenfaren ixataren ay yudfen deg wahil n uselway n tegduda, Abdelaziz Bouteflika.

 Ɣef leḥsab-nnes, daɣ, isenfaren-a yettekka deg-sen ussetrer d ussemɣer n yisugan inezzanen, tuqqna n yisugan-a ɣer ttawilat n umesni, tuqqna n wasunen imguranen gar-asen s webrid n wuzzal, abennu n wammasen n umesni n yelzazen deg yinafagen.

 La ssefrayen yemsuddsen ad d-rzun azal n 4.000 n yinerzafen imsaduren ɣef tmesrit-a aydeg ara d-ilin yisaragen ɣef wayen yeqqnen ɣer umesni n webrid n wuzzal, amesni awlal d wassaɣ gar umesni d tlujistit.

Last modified on Ttlata, 13 Fuṛaṛ 2018 14:14
Arẓam n Tmesrit Tagraɣlant Tis 5 n Umesni d Tlujistit
  Yeffeɣ-d ass n : Ttlata, 13 Fuṛaṛ 2018 12:33     Taggayt : TADAMSA     Ɣran-t : 52 n tikkal   Bḍu