Menu principal

Menu principal

Amhaz n umezgun amaziɣ seg tẓuri taɣerfant ɣer tissudert

Yeffeɣ-d ass n : Laṛebɛa, 07 Tubeṛ 2020 13:44   Ɣran-t : 10 n tikkal
Amhaz n umezgun amaziɣ seg tẓuri taɣerfant ɣer tissudert

LEZZAYER TAMANEƔT – Amhaz n umezgun amaziɣ seg tẓuri taɣerfant armi d asmi ay yewweḍ ɣer tissudert d ayen ay d-ḥkan umeskar n tmezgunin Mohand Ait Ighil d yimsileɣ n umezgun Abdelaziz Hammachi, ass n usinas deg Lezzayer Tamaneɣt, deg yiwen n umyager ɣef umezruy n umezgun amaziɣ.

Amyager-a yella-d deg ukatar n tedyant n « Tuqqla tadelsant » ay d-yebda ass n 26 Ctembeṛ yezrin uɣlif n yidles yernu yessemyuddes-itt d Umezgun Amnaḍan n Abdelmalek-Bouguermouh n Bgayet deg Temkarḍit Taɣelnawt n Lḥamma, ula ma maci aṭas n ugdud ay iḥedṛen deg-s.

Imsaragen smektin-d, seg tazwara, dakken timeskert n umezgun tella d igiman n yiseggasen aya yernu Izzayriyen imaziɣwalen gan amezgun deg tmeddurt-nsen n yal ass, insayen d tmeɣriwin-nsen tiɣerfanin.

« Ssbiba » n Tasili n Ajjer, yersen d tigemmi tanmaḍalt n talsa ɣer Unesco seg 2015, d unsay aqbayli n « Buɛfif » yellan d tadrezt taɣerfant n usegrew n tmellalin, « amɣar n uceqquf » yellan d tadrezt s tgelmusin i usfugel n tefsut, timeɣriwin tiɣerfanin tiqburin igan am umezgun dima llan-d d « aɣbalu ur yettɣaren n yiẓwaren ayseg d-yugem umezgun amaziɣ » ɣef wakken ay d-ssegzan.

Tafugla n « Ayrad » n Tlemsan tettili-d s uḍfar n tegna n usinaṛyu n tidet. Iwadmen-nnes tteqqnen tigelmusin yernu ttlusun ibḍanen n yiɣersiwen ay d-yesmektayen taẓuri n « commedia dell’arte » ɣef wakken ay d-yenna Omar Fetmouche deg uskasi ay d-yellan deg umyager-a.

Deg wayen yerzan assaɣ d tesdawiyin, sḥassfen yimsaragen-a imi qrib ulac akk anermis gar yimezrawen d tnemsal n usileɣ deg umday n tmezgunin, yernu imezrawen isdawanen n tsekla zerrwen kan aḍris d yidis utlayan n tmezgunin.

Smektin-d daɣ yimsaragen-a adraw ameqqran n umeskar n tmezgunin « Muḥya » (Abdellah Mohia – 1950-2004) ay yekkan amur ameqqran seg tmeddurt-nnes deg usezgi n tṣekkiwin timezgunanin tigraɣlanin ɣer tmaziɣt d yidles aqbayli, yernu gar temṣukin-nnes, tella tmezgunt n « Sin-nni » ay d-yettwagmen seg « Iminigen » n Slawomir Mrozek, d tsuqqilt d mennaw n tezlatin.

Yebder-d Abdelaziz Hammachi talliyin yemgerraden n umhaz n umezgun amaziɣ yernu yenna-d dakken tiddukliwin n yiɣerman d yigmamen urarent tamlilt tagejdant d tmeskert n umezgun s tutlayt tamaziɣt, ɣef leḥsab-nnes.

Amecwaṛ n Abdelmamek Bouguermouh (1946-1989), yellan d ameskar ameqqran n tmezgunin, yewwi-d fell-as awal Mohand Ait Ighil ay yeslummsen ɣef tmussni-nnes ayyes yenfeɛ ilemẓiyen yellan deg tiddukliwin n yiɣerman.

« Bouguermouh yella d tawelha i wakk wid yettgen amezgun (…) yernu yella yettakf udem d ahuskay i yimyenkafen », ɣef wakken ay d-yesmekti, am wakken ay d-yerna dakken d aya ay yeǧǧan amezgun amaziɣ ad yekk seg takkayt n tnegmit ɣer tin n thuski taẓurant.

Isaragen n tedyant n « Tuqqla Tadelsant » ad faken ass n ukras s umyager ara gen yigensasen n Umezgun Amnaḍan n Kateb-Yacine n Tizi Uzzu.

 

Amhaz n umezgun amaziɣ seg tẓuri taɣerfant ɣer tissudert
  Yeffeɣ-d ass n : Laṛebɛa, 07 Tubeṛ 2020 13:44     Taggayt : IDLES     Ɣran-t : 10 n tikkal   Bḍu