Menu principal

Menu principal

Aciri n yicanṭiyen imaynuten n tgemmi

Yeffeɣ-d ass n : Laṛebɛa, 20 Mayu 2020 13:11   Ɣran-t : 46 n tikkal
Aciri n yicanṭiyen imaynuten n tgemmi

LEZZAYER TAMANEƔT – Tennan-d tneɣlaft n yidles, Malika Benadouda, ass n uynas deg Lezzayer Tamaneɣt, dakken aɣlif-nnes ad d-icir sin n yicanṭiyen iemqranen deg unrar n tgemmi.

Deg yiwen n umyager d tɣemsa ɣef wallus n ubani n umayas aniran deg ufrag adelsan n Uhaggaṛ, tenna-d tneɣlaft n yidles dakken ad d-ciren asgertel n yisemlen isenzikanen, am wakken ara yettwassenfel uḍris n usaḍuf inebḍen tigemmi tadelsant tangant d trangant.

Asenfar-a n usgertel aṭas aya seg wasmi ay t-bɣan yimsaduren n ugzum-a, gar-asen wid yettmahalen deg Wammas Aɣelnaw n Unadi deg Tsenzikt, yernu ad d-yili s umyalel d wakk tisuda d wammasen n unadi yettmahalen deg tɣult-a.

Tenna-d daɣ tneɣlaft dakken ad yettwassenfel usaḍuf 98-04 yeqqnen ɣer umesten n tgemmi akken ad d-yemyezg d yinfalen imaynuten d tsertit tadelsant n tmurt.

Asaḍuf-a iɛedda deg 1998 yernu yella-d aṭas n usuter i lmend n usenfel-nnes, ladɣa sɣur wid yettmahalen ɣef tgemmi tarangant.

I lmend n wass n 18 Mayu, ass agraɣlan n yisalayen, txebber-d tneɣlaft n yidles ɣef yirmuden iliktṛunanen yemgerraden yeqqnen ɣer tgemmi ay d-yellan seg melmi kan, gar-asen mennaw n yisaragen uhlisen aydeg ttekkan yimazzayen igraɣlanen.

Asfugel-a umḍin n wayyur n tgemmi (18 Yebrir-18 Mayu n yal aseggas) yella-d deffir ma ttwamedlen yisalayen i lmend n uḥezzeb i uzraɛ n unfafad bu uqacuc.

Tesmekti-d daɣ tneɣlaft s lewṣaya-nnes i yinemhalen n yisalayen akken ad ssizedgen isalayen yernu ad ssuddsen tirza tuhlisin i yiɣsuren-nsen.

 

Last modified on Laṛebɛa, 20 Mayu 2020 13:15
Aciri n yicanṭiyen imaynuten n tgemmi
  Yeffeɣ-d ass n : Laṛebɛa, 20 Mayu 2020 13:11     Taggayt : IDLES     Ɣran-t : 46 n tikkal   Bḍu