Tizi Uzzu: Asɛeddi n yiwen n uklip n Zayen ɣef uḥraz n twennaḍt

Yeffeɣ-d ass n : Laṛebɛa, 11 Yebrir 2018 18:08   Ɣran-t : 46 n tikkal
Tizi Uzzu: Asɛeddi n yiwen n uklip n Zayen ɣef uḥraz n twennaḍt

TIZI UZZU – Tessuddes tmehla n yidles n Tizi Uzzu tadwilt n usɛeddi n yiwen n uklip ay d-iga ucennay Zayen ɣef uḥraz n twennaḍt, ass n laṛebɛa deg umezgun n Uxxam n Yidles n Mouloud-Mammeri.

Uqbel ma tebda-d tedwilt-a, gan timikt n tsusmi i lmend n yiriri n tejmilt i wid ay yemmuten deg uɣelluy n usafag aserdasan ass-a deg Bufarik (Leblida).

Ttekkan yinaẓuren yemgerraden deg uklip-a ay d-gan s tmaziɣt, taɛṛabt, tafṛansit d trusit yernu ṣewwren-t-id deg yiɣerman (tuddar) yemgerraden n Tmurt n Leqbayel.

Mi ifuk uklip-nni, yenna-d ucennay Zayen dakken amahil-a yella-d d tiɣri « i ubdad i twennaḍt-nneɣ ».

« Ta d tamezwarut deg umezruy n ccna aqbayli », ɣef wakken ay d-nnan wid ay yettekkan deg uskasi-nni ay d-iḍefren asɛeddi n uklip-a, yernu cekṛen-d yinaẓuren ay iḥedṛen din azwur-a d wussisen n ucennay Zayen akken ad d-yessegrew medden ad mahlen ɣef temsalt n ussizdeg n twennaḍt.

Gren-d daɣ tiɣri yinaẓuren ay iḥedṛen din, wa deffir wayeḍ, i lmend n uḥraz n twennaḍt d tuẓut n yidles awennaḍan deg lbal n tsutwin tilemẓiyin d yibalmuden ara yeddmen asafu azekka.

Ma d tanemhalt n yidles n twilayt n Tizi Uzzu, Nabila Goumeziane, tesnemmer inaẓuren ay yettekkan deg tṣekka-a yernu tenna-d dakken awali n Tizi Uzzu yebded ɣer yidis n uzwur-a am wakken ay d-iḥettet ɣef tallalt n yinaẓuren s wakk ttawilat ay yessefken.

Last modified on Laṛebɛa, 11 Yebrir 2018 18:13
Tizi Uzzu: Asɛeddi n yiwen n uklip n Zayen ɣef uḥraz n twennaḍt
  Yeffeɣ-d ass n : Laṛebɛa, 11 Yebrir 2018 18:08     Taggayt : IDLES     Ɣran-t : 46 n tikkal   Bḍu