Tajmilt i Newwaṛa deg Ldzayer Tamaneɣt

Yeffeɣ-d ass n : Lḥedd, 11 Meɣres 2018 15:06   Ɣran-t : 42 n tikkal
Tajmilt i Newwaṛa deg Ldzayer Tamaneɣt

LDZAYER TAMANEƔT – Rran-as tajmilt ass n ssebt, deg Ldzayer Tamaneɣt, i tcennayt Newwaṛa, yiwet seg tuɣac timeqranin n uẓawan adzayri s tenfalit taqbaylit, yernu yella-d waya s wezwur n Tiddukla Taẓurant d Tdelsant n Umagim Wis 3 s weḥdaṛ n waṭas n medden.

Usan-d aṭas n lɣaci ɣer Umezgun Aɣelnaw n Mahieddine-Bachtarzi akken ad rren tajmilt i tmeṭṭut-a ay d-yeǧǧan isem-nnes deg uẓawan adzayri n yiseggasen n 1960 ama s tɣara tezlatin-nnes neɣ tin n ccna-nnes.

Mi d-tudef Newwaṛa ɣer tzeɣɣa, yemmuger-itt wegdud s yibeddi yernu tezger tazeɣɣa s tyita n ḍḍbel d lɣiḍa n uẓawan afulkluṛan aqbayli, sakkin tuley ɣer wegni ɣer yidis n tzeffant Chafia Boudraa.  

Ttwaɛerḍen-d daɣ yinaẓuren mechuṛen ama seg tsuta taqburt neɣ tamaynut am Nadia Benyoucef, El Ghazi, Abdelkader Chaou,  Samir Toumi, Brahim Tayeb, Meziane Izourane d yinebgi n takunt Baaziz, ma d Newwaṛa wten-as aẓawan 10 n yemẓawanen n tuṛkist n El Bahdja ddaw tmehla n Abdelkrim Benaziz.

D Nadia Benyoucef ay yebdan tajmilt-a s kra n tezlatin n tgemmi tandalusit yernu textem ccna-nnes s tezlit n Ccix El Hachemi Guerrouabi « Tweḥḥect El Bahdja ».

Yuley-d sakkin Meziane Izourane ɣer usayes akken ad d-yecnu « Ansi d-kkiɣ”, d tizlit tamaynut ay iɛejben i wegdud, sakkin yextem-itt s « Zzheṛ-iw anda tensid », d tizlit n tnaẓurt tameqrant Crifa.

Deffir ma yecna-d El Ghazi kra n tezlatin mechuṛen, yuley-d Baaziz s war ma yebna fell-as wegdud ay yumaren aṭas s tisin-nnes, yernu yecna-d tizlit n “Bladi ya Bladi”.

Ma d Newwaṛa tecna-d yiwen n ucewwiq s taɣect-nnes ay mazal am wasmi tella meẓẓiyet, sakkin terna tecna-d A tin yuran deg yiɣef-iw ».

Tagara, d Abdelkader Chaou ay d-yulyen akken ad d-yecnu « El Kesba wana wlid’ha », yiwet seg tezlatin-nnes tineggura. 

 

 

Tajmilt i Newwaṛa deg Ldzayer Tamaneɣt
  Yeffeɣ-d ass n : Lḥedd, 11 Meɣres 2018 15:06     Taggayt : IDLES     Ɣran-t : 42 n tikkal   Bḍu