Tafaska n ssinima tamaziɣt: d asaru n « Taqbilt, amezruy d tesnumegt n Tmazɣa » ayyes tebda tyaka

Yeffeɣ-d ass n : Lḥedd, 25 Fuṛaṛ 2018 16:16   Ɣran-t : 105 n tikkal
Tafaska n ssinima tamaziɣt: d asaru n « Taqbilt, amezruy d tesnumegt n Tmazɣa » ayyes tebda tyaka

TIZI WEZZU – D afetraw n « Taqbilt, amezruy d tesnumegt n Tmazɣa », n Ali Hadjaz, ay d-yesskanayen tiflas tiqburin d yensayen n Tmurt n Leqbayel, ayyes tebda tfaska n usaru amaziɣ, ass n lḥedd deg Tizi Wezzu.

Asaru-a yesɛa 63 n tmikin, yernu d netta ay d d-sɛeddan i wegdud deg ukatar n tyaka n Tfaska Taɣelnawt Tis 16 n Usaru Amaziɣ, ay yebdan ass n ssebt deg Tizi Wezzu.

Asaru-a gan-t-id am uṛupurṭaj n tliẓri yernu yesskanay-d dakken tigemmi tadelsant d tmezruyant n Tmurt n Leqbayel ur d-tettwagem ara kan seg Ṛṛuman yernu laṣel n kra n teflas, insayen d wawalen ay yellan ɣer Leqbayel seg wuqbel n Teglest.

Yeḍfer lebni n usaru-a sin n yigellusen: awennit yeɣra-t-id umesnakal Ali Dardar ay d-iqeddmen turdiwin yemgerraden ɣef unnulfu neɣ laṣel n yismawen n kra n yiyucen, timdinin d yiɣerman.

Anallas Ali Dardar yeḥka-d daɣ, s tewzel, ɣef umezruy n yigelliden imaziɣen am Masensen, aferɛun Cacneq d tamayin yeqqnen ɣer yiyucen igelsanen n tafukt, n yilel d wenẓar.

Asaru-a ddan-d deg-s kra n yeḥricen ay d-ṣewwren s yedṛunen, dɣa d aya ay d-yefkan tugna icebḥen aṭas ɣef yedraren d yiri n yilel n Tmurt n Leqbayel.

Mi yettwatter Ali Dardar ɣef yeɣbula-nnes ussnanen ay yesseqdec i umahil-nnes, yenna-d dakken xuṣṣen yeɣbula taswiɛt-a, yernu iger-d daɣ tiɣri, i lmend n waya, i yimesnilsen d yimesnemdanen akken ad d-rren lwelha-nsen ugar ɣer umezruy d tesnumegt n Yimaziɣen.

Tebda Tfaska-a ass n ssebt yernu ad tkemmel deg wexxam n yedles n Mouloud-Mammeri n Tizi Wezzu arma d ass n laṛebɛa.

7 n yisura ifetrawen, 7 n yisura iwezlanen d 3 n yisura iɣezfanen ara yettekkin deg tyaka i Tzemmurt n Wureɣ.

 

Last modified on Lḥedd, 25 Fuṛaṛ 2018 18:23
Tafaska n ssinima tamaziɣt: d asaru n « Taqbilt, amezruy d tesnumegt n Tmazɣa » ayyes tebda tyaka
  Yeffeɣ-d ass n : Lḥedd, 25 Fuṛaṛ 2018 16:16     Taggayt : IDLES     Ɣran-t : 105 n tikkal   Bḍu