Bumerdas: tlul-d Temɣunt Taɣelnawt n Tsekla Tamaziɣt

Yeffeɣ-d ass n : Letniyen, 22 Yennayer 2018 09:56   Ɣran-t : 310 n tikkal

BUMERDAS – Tlul-d, ass n lḥedd, Temɣunt Taɣelnawt n Tsekla Tamaziɣt deg Bumerdas s wezwur n Tdukli n Yimura Idzayriyen, yernu d Aduktur Tarek Thabet, n tesdawit n Tbatent, ay d imḍebber-nnes.

Yeffeɣ-d yisali n ussebded n tsudut-a deg tgara n yiwen n usarag aɣelnaw ɣef « Tsekta Taɣelnawt n Tsekla Tamaziɣt: amedyaz Ssi Muḥ U Mḥend » ay yeḍḍfen sin n wussan yernu yella-d deg Wexxam n Yedles n Rachid-Mimouni, ɣef wakken ay d-yenna uselway n Tdukli n Yimura Idzayriyen, Youcef Chagra, i Tnegga n Yisalan n Lezzayer.

Deg yiwet n tseɣrut deg yijifeṛ n usarag-a (aydeg ttekkan yesdawanen, irgazen n tsekla d yimedyazen seg 18 n twilayin), yenna-d Mass Chagra dakken azwur-a d lɣella n yeskasiyen ɣezzifen yernu d ilqayanen gar akk imeggiyen ay terza temsalt deg Tdukli n Yimura Idzayriyen, d ayen ay yeḍḍfen 4 n yiseggasen.

Tamɣunt-a Taɣelnawt n Tsekla Tamaziɣt ad d-tili d yiwet seg yifurka n Tdukli n Yimura Idzayriyen ay d-yennulfan deg yiseggasen-a ineggura am Temɣunt Taɣelnawt n Tsekla Taɣerfant d Temɣunt n Tsekla n Yigerdan.

Ɣef leḥsab n yimesbedden-nnes, tamɣunt-a tamaynut iswi-nnes agejdan d asmal d wesnegmu n tsekla tamaziɣt deg wakk timnaḍin n tmurt.

Deg tgara n usarag-a, daɣ, nnan-d dakken sbedden-d arraz aɣelnaw n tsekla tamaziɣt, d win ara ttakfen yal aseggas i tṣekkiwin tiseklanin d timedyazanin ara d-yefrurin s tutlayt tamaziɣt i lmend n yiɣef n useggas amaziɣ.

Ɣef leḥsab n Mass Chagra, arraz-a aɣelnaw ad t-ssuddusen ɣer yidis n usarag aɣelnaw ɣef tsekla tamaziɣt yernu ad yeqqel d tadyant tanseggast.

Assuddes n usarag-a aɣelnaw deg Bumerdas yettekkay deg wesmal d wesnegmu n tsekla tamaziɣt, ɣef wakken ay d-yenna unemhal n wexxam n yedles Rachid-Mimouni, d axxam ay yettekkan deg ussuddes n tedyant-a ɣer yidis n Tdukli n Yimura Idzayriyen.

Last modified on Letniyen, 22 Yennayer 2018 11:22
Bumerdas: tlul-d Temɣunt Taɣelnawt n Tsekla Tamaziɣt
  Yeffeɣ-d ass n : Letniyen, 22 Yennayer 2018 09:56     Taggayt : IDLES     Ɣran-t : 310 n tikkal   Bḍu