Menu principal

Menu principal

Timlilit n unabaḍ: Asekyed n yisenfaren n tanaḍin tislekmanin yerzan mennaw n yigzumen

Yeffeɣ-d ass n : Lexmis, 15 Tubeṛ 2020 09:53   Ɣran-t : 10 n tikkal
Timlilit n unabaḍ: Asekyed n yisenfaren n tanaḍin tislekmanin yerzan mennaw n yigzumen

LEZZAYER TAMANEƔT – Yesselwi uneɣlaf amenzu, Abdelaziz Djerad, ass n ukras, s usarag n teẓrit, yiwet n temlilit n unabaḍ aydeg skeyden isenfaren n tanaḍin tislekmanin yeqqnen ɣer mennaw n yigzumen, am wakken ay d-smenden yineɣlafen n umesni d yiweẓla isɣananen sin n yineskinen, ɣef wakken ay d-yenna yiwen n ulɣu n yimeẓla n uneɣlaf amenzu. D wa ay d aḍris-nnes ummid:

« Yesselwi uneɣlaf amenzu, Mass Abdelaziz Djerad, ass n ukras 14 Tubeṛ 2020, yiwet n temlilit n unabaḍ ay d-yellan s usarag n teẓrit. S uzrak n wahil n temlilit, imaslaḍen n unabaḍ skeyden tam (8) n yisenfaren n tanaḍin tislekmanin ay d-yessemned uneɣlaf n usegmi imineg d unadi ussinan d win n usileɣ d ulmud amsadur, win n temguri tawesfart d sin n yineskinen ay d-smendeg uneɣlaf n umesni d win n yiweẓla isɣananen d lḥubus.

1- Anabaḍ yesla i uneskin n uneɣlaf n uelmed imineg d unadi ussnan yeqqnen ɣer kuẓ (04) n yisenfaren n tanaḍin tislekmanin yettwaddmen i lmend n usmal n wakaten n umagrad 39 n usaḍuf 99-05 n 4 Yebrir 1999, yettwasneflen yernu yettwassmed, win yerzan asaḍuf n ulmud imineg.

Isenfaren-a n tanaḍin tislekmanin rzan kuẓ (04) n wammasen isdawanen deg Tmenɣest, Tisemsilt, Ɛin Timucent d Ɣilizan ara rren d tisdawiyin.

S waya, asmal n wammasen-a isdawanen akken ad qqlen d tisdawiyin yella-d deg ukatar n useḍru n tsertit taɣelnawt i usejhed n uẓeḍwu n yiɣsuren n ulmud imineg yernu yella-d waya deffir ma ssemlalen-d wammasen-a isdawanen akk tiwtilin yessefken akken ad ttwasemlen d tisdawiyin.

2- Yessefled unabaḍ i yiwen n uneskin ay d-yessemned uneɣlaf n usileɣ d ulmud amsadur yeqqnen ɣer usenfar n tanaḍt tasmekmant yessenfalen yernu yessmad tanaḍt taslekmant 18-162 n 14 Yunyu 2018 ay isebḍen tiwtilin n useɣnew, arẓam d ubaḍi n uɣsur uslig n usileɣ neɣ n ulmud amsadur.

Asenfar-a n tanaḍt taslekmant iswi-nnes d assmad n tanaḍt taslekmant 18-162 n 14 Yunyu 2018 i lmend n tukksa n kra n yikmaren yeqqnen ɣer useɣnew d urẓam n yiɣsuren usligen, ladɣa deg wayen yerzan asifses n tsekkirin tideblanin i yiweggiden ifekkanen neɣ inimer ay yeɣsen ad sseftin deg unrar n usileɣ d ulmud amsadur, asemnekni n tgertilt tasensegmant n twilayt ɣef leḥsab n tmezzugin ay ttnadin medden ad tent-lemden d uselhu n wassaɣ gar usumer n usileɣ n uɣsur uslig d unrar adamsan aydeg temmuzzeg twilayt aydeg yella uɣsur-nni.

Deffir usemned n uḍris-nni, ɣetsen ad d-sɣenwen tasmilt ara d-yelhun s usekyed n tegnit n yiɣsuren usligen n usileɣ amsadur.

3- Yesla unabaḍ aneskin ay d-yessemned uneɣlaf n temguri tawesfart yerzan kraḍ (03) n yisenfaren n tanaḍin tislekmanin yeqqnen ɣer uqbal n yimetwiyen isnajyanen, tiskarin n uklas n yifarisen iwesfaren d tuɣdaḍin, wid ara yettekkin, asuddes d umuzel n tseqqimt tadamsant tagragzumt n yisafaren.

Isenfaren-a n usaḍuf iswi-nsen d assmad n uslagan yerzan anrar-a akken ad d-yemyezg s tuɣdaḍin d tzemmar yettunefken i uɣlif n temguri tawesfart s usmidden n tsunḍa yessenfalen yernu tessmad asaḍuf 18-11 n 2 Yulyu 2018 yeqqnen ɣer tdawsa.

Isenfaren-a n tanaḍt taslekmant iswi-nsen d aseɣnew n ukatar asuddsan anmeẓẓal ara yeǧǧen Tanegga Taɣelnawt n Yifarisen Iwesfaren ad teg tuɣdaḍin-nnes s tummda deg wayen yerzan aklas n yisafaren, asbaḍ n watigen-nsen n usenzi d teskarin n uqbal n yimetwiyen isnajyanen.

Asaḍuf-a d win daɣ yerzan tasekkirt n uklas n ufaris awesfar yernu d tin aydeg yessefk ad yili uktazel d imdeqqeq n yisefka ara d-yefk umasay n usenzi n ufaris-nni akken ad d-yefk anẓa dakken afaris-nni ur yettḍurru ara, d amellil, n tɣara yernu d uɣlis. Ma d tasekkirt n uqbal n yimetwiyen ay d-yessefra uḍris yettwaskeyden, iswi-nnes d aḍman dakken imetwiyen isnajyanen ara d-yersen deg wulzuz url lin ara d amihi ɣef tɣellist d tdawsa n yimuḍinen yernu ad d-yili waya s uktazel atwilan n yikaramen-nsen uqbel ma yettunefk-asen uɣtas n uqbal sɣur Tnegga Taɣelnawt n Yifarisen Iwesfaren.

Daɣ, asenfar n tanaḍt taslekmant yerzan tuɣdaḍin, wid ara yettekkin, asuddes d umuzel n Tseqqimt Tadamsant Agragzumt n Yisafaren iswi-nnes d tukci n tzemmar i ugman-a ara d-yelhun s usekyed n watig n wakk isafaren ara yettwakelsen, ama d isafaren yettwaɣerfen neɣ d isafaren yettwaswetlen deg Lezzayer neɣ daɣ, d isafaren d-yettwaǧwen, yernu ad d-yili waya ama isafaren-a ttarran-d idrimen-nsen neɣ ur ten-id-ttarran ara ɣer unagraw n tɣellist tanmettit.

4- Yesla unabaḍ daɣ i uneskin ay d-yessemned uneɣlaf n umesni ɣef tesnuddest n usnegmu n umesni awlal. Tasnuddest-a tamaynut ssumren-tt-id s uɣawas n usnegmu yebḍan ɣef sa (07) n yigellusen yerzan:

- Asɣelles n usigeẓ n tmurt s yifarisen isnuddsanen.

- Adraw axatar deg umesni n yilzazen seg neɣ ɣer Lezzayer.

- Asenqes n usekki n uqariḍ awerdani ɣer uzɣar i lmend n yimeẓla.

I lmend n waya, yettwassumer-d uɣawas n tigawt i ulsuddes n tkebbaniyin tinagdudin n umesni awlal n yimsiklen d yilzazen d wakaten ara yettwaddmen i usɣelles n waǧaw n yifarisen isnuddsanen, seg yidis, d usejhed n tkebbanit n umesni n yimsuklen i uselhu n usedwet n usuter d usineḍ n yirmuden-nnes, seg yidis niḍen.

5- Deg tgara, yesla unabaḍ i uneskin ay d-yessemned Mass aneɣlaf n yiweẓla iwerdaniyen d lḥubus ɣef uẓunẓu n Tmesgida Tameqqrant n Lezzayer.

Deffir uneskin-a, ixebber-d uneɣlaf amenzu ɣef yiɣtasen n uselway n tegduda yerzan arẓam n tzeqqa n tẓallit n Tmesgida Tameqqrant n Lezzayer d tukksa n usigel n tẓallit n usimwas.

Tagnit n tkaɣreft n unfafad bu uqacuc (Covid-19) d umhaz-nnes deg umaḍal akked tmurt d ayen ay ireglen abrid i uẓunẓu n Tmesgida Tameqqrant n Lezzayer s uḥdaṛ n yiduba isɣananen inselmen seg semmus n yimenẓawen, tisuda d tesdawiyin n umaḍal ineslem, tuddsiwin tigraɣlanin tislamanin, imassanen d waggagen.

Ɣef lǧal n waya, yernu akken kan ara tɛeddi tkaɣreft, Mass aselway n tegduda ad yeẓẓunẓu Tamesgida Tameqqrant n Lezzayer s tihawt n yinebgiwen n Lezzayer.

Seg leɛḍil ad d-yili uẓunẓu-a, Mass aselway n tegduda, yernu deffir ma yemcawaṛ n Useqqamu Islaman Unnig, yeɣtes, deg tazwara, ad yerẓem tazeqqa n tẓallit n Tmesgida Tameqqrant n Lezzayer i lmend n usfugel n lmulud ara d-yilin ass n ukras, 11 Ṛabiɛ Amenzu, 1442, yeddan d 28 Tubeṛ 2020.

Arẓam-a n tzeqqa n tẓallit ad d-yili kra n wussan uqbel asfugel n 1u n Wamber 1954, azemz n tnekra n tegrawla, yernu, s waya, ad d-yili wassaɣ ijehden gar uɣref azzayri d wakud-a amezruyan ay t-yessawḍen ad d-yeslelli iman-nnes seg usehres.

Deg wayen yerzan taẓallit n usimwas, deffir ma yemcawaṛ Mass aselway n tedguda d Useqqamu Islaman Unnig d tseqqimt tussnant ɣer uɣlif n tdawsa, taɣerfa d usmeskel n yisegnafen, yeɣtes ad yekkes asigel n tẓallit-a seg wass n ukras 20 Ṛabiɛ Amenzu, 1442 yeddan d 6 Wamber 2020 deg tmesgidiwin yesɛan akettur yekkan i 1.000 n yimẓulla deg wakk timnaḍin n tmurt, deg tazwara-a.

Deg wayen yerzan taẓallit n tfejrit, ad tettwassireg seg wass-nni daɣ d asawen deg wakk timnaḍin n ugelluy aɣelnaw, ula deg twilayin ay yerza usekmen amuran deg uxxam.

I lmend n waya, yesmekti-d uneɣlaf amenzu dakken tiddit-a tamleɣwayt ay d-yettilin cwiṭ, cwiṭ, d tin ay yessawḍen ɣer ubaḍi d userked n umhaz n tkaɣreft n unfafad bu uqacuc (Covid-19) deg tmurt, yernu yella-d waya s wussisen n yiduba inagduden, tafekka tasnajyant, tafrit n yiɣermanen d temsetlelt n uɣref azzayri akken ma yella.

Anabaḍ yettkel ɣef tmasit n yiɣermanen d tɣermanin akken ad kemmlen ad zerrken akaten n umgugu anmetti, tuqqna tuḥtimt n tgelmust, aseqdec n tersalt taɣismant, asinef i umsegrawen d teɣḍeft imi anfafad bu uqacuc n Covid-19 mazal-it d urmid.

Yesmekti-d, deg tgara, dakken win ur izerrken ara lewṣayat n yiduba inagduden ad yettwaweddeb. »

 

Timlilit n unabaḍ: Asekyed n yisenfaren n tanaḍin tislekmanin yerzan mennaw n yigzumen
  Yeffeɣ-d ass n : Lexmis, 15 Tubeṛ 2020 09:53     Taggayt : LEZZAYER     Ɣran-t : 10 n tikkal   Bḍu