Menu principal

Menu principal

Targa tafṛansit n M6 tettwagdel ad tmahel deg Lezzayer

Yeffeɣ-d ass n : Ttlata, 22 Ctembeṛ 2020 11:45   Ɣran-t : 24 n tikkal
Targa tafṛansit n M6 tettwagdel ad tmahel deg Lezzayer

LEZZAYER TAMANEƔT – Yenna-d uɣlif n teɣwalt, ass n uynas, dakken yeɣtes « ur yessarag ara » i terga tafṛansit n M6 ad tkemmel amahil-nnes deg Lezzayer deffir ma tesɛedda-d, ass n usamas tameddit yiwen n ufetraw yesɛan tamuɣli d tuzligt ɣef Umussu Aɣerfan yernu tga-t-id yiwet n teɣlamt yesɛan « asireg n ubran d akellax ».

« Ayen akka yeḍran yessaweḍ-aɣ ur nessarag ara M6 ad tkemmel amahil deg Lezzayer akken yeɣs yili umahil-nni », ɣef wakken ay d-yenna uɣlif deg yiwen n ulɣu. Ɣef leḥsab n uɣbalu-a, « d yiwet n tneɣmast tafṛansit-tazzayrit ay d-yelhan s useḍru n usaru-a s tallalt n yiwen n 'umalal azzayri’  yernu llan sɛan asireg n ubran d akellax ».

« Arkaḍ-a n usaḍuf yella fell-as uweddeb d aqesḥan yernu aya ur yettwasfaḍ ara seg umiḍan n sin-a n yimdanen ay yessefken ad ttwacaṛɛen deg ukatar n umagrad 216 n usaḍuf azzayri n uweddeb ɣef lǧal n useqdec n teftarin tikellaxin », ɣef wakken ay d-yenna uɣlif.

« Yessefk ad d-nger tamawt dakken yal tikkelt aydeg ara d-iqerreb kra n usihaṛ afranan axatar i uzekka n Lezzayer, kra n yimidyaten ifṛansiyen ttgen-d yernu sɛeddayen-d irupurṭajen n usaru neɣ yuran akken ad armen ad rẓen ifadden i uɣref azzayri, ladɣa ilemẓiyen-nnes », ɣef wakken ay d-yesḥassef uɣbalu-a.

Aɣlif n teɣwalt yenna-d, i lmend n waya, dakken « imidyaten-a sɛan tasmektayt yekkaten akken ad tessimes tugna n Lezzayer yernu ad teswaɣ taflest yellan gar uɣref azzayri d tsuda-nnes, yernu ttmahalen ddukkli deg yiswiren d yisulal yemgerraden ».  Yesmekti-d uɣlif n teɣwalt, i lmend n waya, dakken tanarit n tɣemsa n M6 tessuter, ass n 6 Meɣres 2020, awekkel n tɣemsa sɣur yiduba izzayriyen akken ad d-tas teɣlamt n terga-a ad d-tessurret tasgilt n « Enquete Exclusive » deg Lezzyaer yernu asentel n ufetraw-a d tadamsa d tmerrit deg temdint n Wehṛan d tuggta n yidelsan deg tmurt-nneɣ.

« Asuter-a yettwagi sɣur yimeẓla n uɣlif n teɣwalt d wid n uɣlif n yiweẓla iwerdaniyen », ɣef wakken ay d-iwekked, am wakken ay d-yerna dakken « deg tgara, taɣlamt-a tga-d afetraw niḍen yemgerraden ɣef usentel-nni, yernu iɛedda-d ass n 20 Ctembeṛ 2020 ɣef tis 11:10 n yiḍ (s wakud n Fṛansa) s uzwel n ‘Lezzayer, Tamurt n Tnekriwin’ , d afetraw ay d-yefkan tamuɣli d tuzligt ɣef Umussu Aɣerfan ».

 

Last modified on Laṛebɛa, 23 Ctembeṛ 2020 09:28
Targa tafṛansit n M6 tettwagdel ad tmahel deg Lezzayer
  Yeffeɣ-d ass n : Ttlata, 22 Ctembeṛ 2020 11:45     Taggayt : LEZZAYER     Ɣran-t : 24 n tikkal   Bḍu