Menu principal

Menu principal

Lezzayer d Fṛansa: Llan-d yisurifen deg temsal n tkatut ula ma mazal ttkemmilen kra ackaṛ n usehres

Yeffeɣ-d ass n : Ljemɛa, 10 Yulyu 2020 14:57   Ɣran-t : 0 n tikkal
Lezzayer d Fṛansa: Llan-d yisurifen deg temsal n tkatut ula ma mazal ttkemmilen kra ackaṛ n usehres

LEZZAYER TAMANEƔT – Deg wakud aydeg ulint-d kra n tuɣac deg Fṛansa, ssuturent-d seg tmurt-a ad testeɛṛef s tucciḍin ay tga deg tallit n yizri-nnes ahersan (takriḍt, tijrimin mgal talsa), wiyaḍ mazal bɣan ad kemmlen ad d-zzin s uɛrur i tekriḍt timiɣeft ay d-yellan deg tallit-nni, am wakken ay ttkemmilen cekkṛen-d « idisan umnigen n usehres ».

Sɣur M. AIT MOUHOUB

Akaram n usehres d win aydeg llant aṭas n temsal yeqqnen ɣer uɛetteb, aseɛreq n yimdanen, tinegzarin d tejrimin mgal talsa, yernu yesɛa lmizan d ameqran deg wassaɣen gar Lezzayer d Fṛansa. S waya, seg-a ɣer da, ad d-yeqqel ukaram-a akken ad iḥaz assaɣen yellan gar snat-a n tmura.

Seg 2017, acḥal d tikkelt ay d-yessawel uselway afṛansi Emmanuel Macron ɣef temsal n tkatut yellan gar Lezzayer d Fṛansa.

Deg terzi-nnes ɣef Lezzayer, Mass Macron yenna-d dakken asehres d « tajrimt ». « Aya d tajrimt mgal talsa. D tiwwagent n tidet yernu aya d aḥric seg yizri. Yessefk ad nqabel tamsal-a am wakken ay yessefk ad nessuter seg wid d tid ay nḍurr s waya ad aɣ-ssurfen », ɣef wakken ay d-iqarr.

Aseggas deffir waya, deg 2018, yesteɛṛef uselway Macron s wudem afraray yernu s yisem n Tegduda Tafṛansit, dakken amusnak ilemẓi Maurice Audin, yellan d ameɣnas i uzarug n Lezzayer, ɛettben-t yiredsanen ay t-yewwin seg uxxam yernu yezmer lḥal ya ad yili yettwaɛetteb armi ay yemmut neɣ yettwaɛetteb sakkin yettwenɣ.

Asteɛṛef-a s uɛetteb sɣur uselway Macron yella-d deffir ma llan-d yinadiyen sɣur yinmezruyen d yineɣmasen iḍefren abrid n Pierre-Vidal Naquet, yernu kecfen-d tidet ɣef uɛraq n Maurice Audin. S waya, testeɛṛef Fṛansa s wudem unṣib dakken ameɣnas-a ilemẓi yeɛreq deg Yunyu n 1957 yernu yemmut s uɛetteb ɣef lǧal n unagraw ay d-tga Fṛansa deg Lezzayer.

Ɣer yidis n Maurice Audin, d igiman n yimdanen niḍen ay iɛerqen, gar-asen aṭas deg Tmiwta n Lezzayer. I usmekti, yenna-d umaru amatu n tnabdat n Lezzayer d-yelhan s temsulta, Paul Teigen, deg tebṛat-nnes n utixer, dakken 3024 n yimdanen ay iɛerqen deg Temdint n Lezzayer deg useggas n 1957.

Anazbay-a afṛansi yennuɣen mgal uwdag almani anazi iɣunfa adhal ay dehlen yiɣellaten-nnes –Yves Lacoste d unebdad Serge Baret- imsersa ay yellan sɛan tizemmar ad gen ayen ay asen-yehwan deg Temdint n Lezzayer, yernu ula d netta ggzen-t s tmettant.

Aṭas n yimdanen ay d-yessummlen timeskar tucmitin n Fṛansa deg Lezzayer, ama deg Fṛansa, ama deg umaḍal. Aseqdec anagrawan n uɛetteb d tmenɣiwt yeffɣen i teɣdemt d ayen ay d-yellan s yisem n yiduba uzzigen ay yettunefken i yiredanen, yernu aya iwet-d deg-s uɣella n uɣmis n « Alger Republicain », Henri Alleg, deg udlis-nnes n « Tuttra » ay d-yura deg yiferki n ubduz yernu yeffeɣ-d d adlis ɣer teẓrigin n Minuit deg 1958, am wakken ay d-yettwakcef daɣ waya deg udlis n « Uselwet » umi d-iga tazwert Abdelhafidh Keramane yernu yeffeɣ-d ɣer teẓrigin n Nils Anderson.

Tiɣri ay d-gren yimdanen-a tettwaddem ass n 6 Ctembeṛ 1960 sɣur « Tuɣac Tilelliyin deg Wakal Afṛansi ». Ta d taskint ay zemlen 121 n waggagen, isdawanen d yinaẓuren ifṛansiyen yernu tettwassen daɣ s yisem n « Tesguri ɣef uzref n urkennu deg Umgaru n Lezzayer ».

 

= Imekkusa n Aussaresses =

Paul Aussaresses, yellan d amasay n uzlu n « O » n yimsersa, iqarr-d ɣef wayen ay iga deg umgaru n Lezzayer yernu yenna-d dakken azlu-a yesseɛreq aṭas n yimdanen deg Tmiwta n Lezzayer, am wakken ay yesseɣdem aseqdec n uɛetteb deg Umgaru n Uslelli Aɣelnaw, d acu kan, ayen ay d-yekcef Aussaresses icewwel s tidet alubi n wid yekkaten ɣef tekti n « tuɣdaḍt n uzraɛ n tɣerma s usehres ». Deg tkatutin-nnes ay d-yeffɣen deg 2001, Aussaresses yesteɛref dakken d netta ay d amasay deg useɛreq n Larbi Ben Mhidi, Ali Mendjeli d yimeɣnasen niḍen ay yennuɣen ɣef Lezzayer.

Iqirriyen-a d wid ay yessawḍen Fṛansa ad yesɛeddi asaḍuf n 2005 akken ad teṣṣer tucmitin ay d-yellan deg umezruy-nnes ahersan.

Imekkusa n Aussaresses ɛerḍen ad sɛeddin deg Ugraw Aɣelnaw (amni afṛansi) asaḍuf ara yesmangen asehres, yernu aṭas n yinmezruyen ifṛansiyen ay yessaẓren asaḍuf-a. Kra n tuɣac ssaẓrent « amruj yellan deg tkatut tahersant ». Timsal n « nndama » d « yidisan yelhan n usehres » sqedcen-tent kra n yidisan akken ad rebḥen deg tefranin.

Kra n yidisan sḥassfen imi ay llan kra ay yettarmen ad rren ama d win yenɣan, ama d win yettwenɣen kifkit-iten. Ɣef wakken ay d-yenna unmezruy Gilles Manceron, tisuda tisertanin tifṛansiyin sɛant timuɣliwin isebken ay d-yettwaweṛten seg tallit tahersant.

Asaḍuf n 13 Fuṛaṛ 2005, ɣef leḥsab n Manceron, d agmuḍ ay d-yekkan seg temlilit n tegrawt tameẓriɣeft n yiḍarren iberkanen iqerben ɣer Tuddsa n Tredsa Tuffirt d kra n yiwamniyen ifṛansiyen ay asen-yefkan tameẓẓuɣt yernu ur ɣrin ara inadiyen ineggura ay d-yellan ɣef umezruy ahersan afṛansi.

Deg tezwara n teswatut-a, yella-d aṭas n uskasi ɣef temsal yeqqnen ɣer tkatut gar Lezzayer d Fṛansa. Aṭas n tɣawsiwin ay d-yettwakecfen ɣef yiwen n yizri d aberkan ay tessaẓer talsa.

Deg tedyanin-a akk n ukcaf, kra n wudmawen isertanen ifṛansiyen yettwassnen s tujjma-nsen i usehres, ttwasbehdlen, yernu akka ay d-yella lḥal d Jean-Marie Le Pen, aselway aqbur n ukabar n uyeffes imiɣef, Tirni Taɣelnawt, ay icuṛɛen aɣmis n Le Monde de 2003 ɣef lǧal n yimagraden ay d-yessuffeɣ deg 4 Mayu d 4 Yunyu ɣef uttekki n Le Pen deg uɛetteb deg Lezzayer.

Taxxamt Taseɣtant tis 17 n Tnefrut n Paris teɛfa-as i uɣmis n Le Monde ass n 26 Yunyu 2003, yernu tugi acetki n Jean-Mari Le Pen ay icuṛɛen aɣmis-a ɣef ucemmet.

Marine Le Pen, ay iḍefren ula d nettat abrid n unkaṛ n umezruy, yelli-s n Jean-Marie Le Pen yernu d tamekkasut-nnes tasnaktant (yellan d taselwayt n ukabar n Umsegraw Afṛansi) turem ula d nettat ad teṣṣer tucmitin tifṛansiyin deg tallit tahersant s uckaṛ n usehres deg Twitter.

Ɣef leḥsab n kra n yimanayen, ɣef waya ay d-yenna uselway n tegduda, Abdelmadjid Tebboune, mi iga amyager amezwaru d yigensasen n tɣemsa taɣelnawt, deg Yennayer n 2020, dakken « yella, deg Fṛansa, ulubi iceḥnen ɣef Lezzayer ».

Mass Tebboune yebder-d daɣ ilubiyen-a deg yiwen n udiwenni ay iga d uɣmis n Figaro, am wakken ay d-iwekked dakken aselway Macron « yettarem ad yefru ugur-a n tkatut ay yeswaɣen assaɣen gar tmura-nneɣ ».

« Tikkal, ugur-a ur yettwagza ara, maca tikka, neṭṭgen-d fell-as yilubiyen d ujhiden (…). Yella yiwen n ulubi yeṭṭfen cceḥna, d win ay mazal yettargu s temsunt ay yesṛuḥ (…) » ay d-yenna Mass Tebboune deg tdiwennit-nni.

 

Lezzayer d Fṛansa: Llan-d yisurifen deg temsal n tkatut ula ma mazal ttkemmilen kra ackaṛ n usehres
  Yeffeɣ-d ass n : Ljemɛa, 10 Yulyu 2020 14:57     Taggayt : LEZZAYER     Ɣran-t : 0 n tikkal   Bḍu