Menu principal

Menu principal

Anfafad bu uqacuc: Yesselwi uselway Tebboune timlilit i usekyed n tegnit tadawsant n tmurt

Yeffeɣ-d ass n : Ljemɛa, 10 Yulyu 2020 13:48   Ɣran-t : 0 n tikkal
Anfafad bu uqacuc: Yesselwi uselway Tebboune timlilit i usekyed n tegnit tadawsant n tmurt

LEZZAYER TAMANEƔT – Yesselwi uselway n tegduda, Abdelmadjid Tebboune, ass n ukwas, tiɣimit n umahil i usekyed n tegnit tadwsant n tmurt ɣef lǧal n tmerniwt n tejṛa n unfafad bu uqacuc deg mennaw n twilayin, ɣef wakken ay d-yenna yiwen n ulɣu n tselwit.

Menɣir aneɣlaf amenzu, ttekkan daɣ deg temlilit-a uneɣlaf n unegsu, aneɣlaf n tdasa, aneɣlaf n temguri tawesfart, amenzaḍ n temsetla taɣelnawt, anemhal amatu n tɣellist taɣelnawt, iwaliyen n Lezzayer, Wehṛan, Tibeskert, Sḍif d Waregla d yimaslaḍen n Tseqqimt Tussnant n Uḍfar n Umhaz n Tkaɣreft n Unfafad bu Uqacuc.

Yenna-d uselway n tegduda dakken yeṛtaḥ imi ay yerna umḍan n wid yejjin seg waṭṭan-a, am wakken ay d-yenqes umḍan n yimettinen ɣer ddaw 10.

D acu kan, yenna-d daɣ dakken tecɣeb-it temsalt n tmerniwt n tejṛa n unfafad bu uqacuc, yernu d aya ay yessawḍen timṣukin tidawsanin n tmurt ad ččaṛent yernu ur zemmrent ara ad mmagrent akk wid yettaḍnen, dɣa d aya ay yernan yeswaɣ taɣara n ubdad i yimuḍinen.

Deffir ma qeddmen-d yiwaliyen ay iḥedṛen deg temlilit-a ineskinen-nsen yernu yella-d fell-asen uskasi, ɣetsen ad ddmen akaten-a akken ad tettwaḥkem tegnit:

- Ad d-sɣenwen asenkid d uzzig ara ixelleṣ uwanak yernu ad d-yili i lfayda n yimsujjiyen d yimahalen niḍen n tdawsa tanagdudt imi d nitni ay d imdanen ay terza srid temsalt n umennuɣ mgal tkaɣreft n unfafad bu uqacuc.

- Ad yettunefk usireg i wakk tinarmin, ama d tinagdudin neɣ d tusligin, akken ad gent tislaḍ n ukcaf n unfafad bu uqacuc akken ad yenqes wadad ɣef Usudu n Pasteur d tumrizin ay yesɛa deg wakk tiwilayin.

- Ad ttekkint tseqqimin n yigmamen d tiddukliwin n tmetti taɣarimt deg tsentayin ara d-yekken seg yiwaliyen i lmend n usegrer n yiɣermanen.

- Ad yettunefk uzref i yiwaliyen akken ad d-sbegsen ammaken ara ḥwijen i umennuɣ mgal unfafad bu uqacuc.

- Asemɣer n yisatimen imezgiyen n wammaken n ukcaf n waḍḍan d wujsijin asnajyan am wakken ara ttwaḍefren yisatimen-a yal ass deg yal tawilayt.

- Agdal n uzlay abridan, i tallit n yimalas ara yebdun seg wass n usimwas, i wakk imseddayen imaẓlayen ara yeddun neɣ ad ffɣen seg 29 n twilayin yernu ti d Bumerdas, Suq Ahṛas, Tisemsilt, Ǧelfa, Mɛeskeṛ, Um Lebwaqi, Tabatent, Tubiret, Ɣilizan, Tibeskert, Tixencelt, Tamsilt, Cclef, Sidi Belɛebbas, Lemdeyya, Leblida, Lbuṛj Buɛṛiṛij, Tipaza, Waregla, Beccaṛ, Lezzayer, Qsenṭina, Wehṛan, Sḍif, Ɛennaba, Bgayet, Adrar, Leɣwaṭ d Wad Suf.

- Agdal, seg wass n usimwas d asawen, n umesni amdinan anagdud d wuslig deg tgariwin n yimalas deg 29 n twilayin ay tḥuza taluft.

- Asizrer n yizenqan d wulzuzen acḥal d tikkelt deg wass.

- Asebges n yimsujjiyen n teṛmisin ur yettmahalen ara akken ad allen deg umennuɣ mgal unfafad bu uqacuc, yernu, mer ad ttwasbegsen, ad ttwaxellṣen ɣef waya.

 

 

Anfafad bu uqacuc: Yesselwi uselway Tebboune timlilit i usekyed n tegnit tadawsant n tmurt
  Yeffeɣ-d ass n : Ljemɛa, 10 Yulyu 2020 13:48     Taggayt : LEZZAYER     Ɣran-t : 0 n tikkal   Bḍu