Menu principal

Menu principal

Lezzayer tettemsizzil d wakud akken ad d-tebnu tadamsa yexḍan tamaɣult

Yeffeɣ-d ass n : Letniyen, 29 Yunyu 2020 10:18   Ɣran-t : 2 n tikkal
Lezzayer tettemsizzil d wakud akken ad d-tebnu tadamsa yexḍan tamaɣult

LEZZAYER TAMANEƔT – Lezzayer tettemsizzil d wakud akken ad d-tebnu tadamsa yexḍan tamaɣult ara yesselhun amaduf n lxezna yernu ad d-tesseɣnew timras, ɣef wakken ay d-iwekked, ass n usamas, uselway n tegduda, Abdelmadjid Tebboune, deg useqqamu n yineɣlafen ay d-yellan ddaw tselwit-nnes.

« Aql-aɣ deg temsizzelt d wakud i lebni n tdamsa yexḍan tamaɣult ara yesselhun amaduf n lxezna, ad d-tesseɣnew timras i yilemẓiyen yernu ad tessenqes aǧaw i uḥraz n tḥazazin n usenfel », ɣef wakken ay d-yenna uselway n tegduda i yimaslaḍen n unabaḍ.

Yerna-d daɣ dakken « aɣref ad ken-yezref ɣef leḥsab n umahil-nwen deg unrar, s waya, ilit d amedya deg tuṭṭfa deg wawal, deg umiḍwel d umahil s tɣersawt, yernu ussan-a, mi d-tettqerrib tmeɣra n uzarug, cfut dima dakken akken bɣunt ilint tɣersawin-nwen, werǧin ad awḍent ɣer tmeqqit n yidammen yeṣfan ay fkan yimeɣrusen n Umgaru n Uslelli Aɣelnaw d wid yettekkan deg waɣan aɣelnaw deffir ma tewwi tmurt azarug ».

Deg wayen yerzan asenfel n yineɣlafen ay d-yellan seg melmi kan d useɣnew n yigezda d ixataren yeqqnen srid ɣer tmeddurt tayalast n uɣerman, iweṣṣa-d uselway ɣef usewjed n uɣawas ara d-yettwaqeddmen deg useqqamu n yineɣlafen deffir ma yesleḍ-itt unabaḍ.

I lmend n waya, iweṣṣa aneɣlaf n tkerrazt ad d-yessewjed azmam n tewtilin n Usira n Usnegmu n Tkerrazt Tamgurant deg Yikalen Iniranen i lmend n uskurrez n ukbal d tyafutin d-yettakfen askeṛ d uzatim i tmerniwt n ukettur akerrazan aɣelnaw yernu ad teḍmen tmurt taɣellist-nnes tameččant.

 

Lezzayer tettemsizzil d wakud akken ad d-tebnu tadamsa yexḍan tamaɣult
  Yeffeɣ-d ass n : Letniyen, 29 Yunyu 2020 10:18     Taggayt : LEZZAYER     Ɣran-t : 2 n tikkal   Bḍu