Tiɣri i uḥraz n timmuzɣa seg usawem iɛiqqer d usseqdec asertan – Asarag

Yeffeɣ-d ass n : Lexmis, 12 Yebrir 2018 15:08   Ɣran-t : 76 n tikkal
Tiɣri i uḥraz n timmuzɣa seg usawem iɛiqqer d usseqdec asertan – Asarag

LEZZAYER TAMANEƔT – Gren-d tiɣri yimttekkiyen deg usarag n « Tilawt n Timmuzɣa deg Lezzayer », ass n laṛebɛa deg Lezzayer, i uḥraz n timmuzɣa seg usawem iɛiqqer, iskasiyen ur yettfakan d usseqdec asertan ».

Deg usarag-a ay yessuddes Useqqamu n Uɣlan s umyalel d Useqqamu Unnig i Timmuzɣa yernu tesselwit tselwayt n Useqqamu, Nouara Saadia Djaafar, wekkden-d yimttekkiyen ɣef tḍullit n ussersi n uskasi ɣef tmaziɣt deg « tallunt-nnes tagamant », anamek-nnes deg yiɣsuren ussnanen d yisdawanen, i lmend n urgal n ubrid i usawem d usseqdec ur yellin ara akk deg leṣlaḥ unnig n tmurt.

I lmend n waya, yenna-d umaru amatu n Useqqamu Unnig i Timmuzɣa, Si El Hachemi Assad, dakken tasudut-nnes la yettmahal akken ad yefk azal i timmuzɣa yernu ad tt-yerḥrez seg uskasi ur yettfakan, am wakken ay tesseḥbibir tsudut-a ɣef ussersi n uskasi ɣef timmuzɣa deg tallunt-nnes tagamant.

Deffir ma yesmekti-d s yisurifen imezruyanen ayɣef ay d-yekka usmal n timmuzɣa, yerra umaru amatu n Useqqamu tajmilt i uselway n tegduda ay d-iheyyan aɣawas i yiriri n wazal i tmagti taɣelnawt am wakken ay d-iwekked dakken aselway yessaweḍ ad d-nessebded amtawa asertan ɣef timmuzɣa.

Yenna-d daɣ umaru amatu n Useqqamu dakken yessefk ad ttwasbegsent akk tsuda tiɣelnawin d yikabaren isertanen am wakken ay yessefk ad yili ussemyuddes gar yegzumen yemgerraden i lmend n usmal n tmaziɣt. Yesmekti-d daɣ dakken Aseqqamu yesɛa amtawa n ticcurka d uɣlif n ussegmi aɣelnaw, d win ay yettwazemlen deg Fuṛaṛ n 2015, sakkin yerna yezmel wayeḍ d uɣlif n yidles deg Yennayer n 2016 d wayeḍ d uɣlif n teɣwalt deg Fuṛaṛ n useggas-nni.

Yeckeṛ-d daɣ umaru amatu n Useqqamu Unnig i Timmuzɣa s ticcurka ay yellan gar tsudut-nnes d Tnegga n Yisalan n Lezzayer ay d-yebdan deg Mayu 2015 asmi ay d-tcar Tnegga asmel unṣib amezwaru s tutlayt tamaziɣt i lmend n Wass Agraɣlan n Tlelli n Wawal, yernu iwekked-d dakken ticcurka-a d tamudemt ay d-yellan i lmend n nnfeɛ unnig n tmurt.

Ma d aselmad asdawan Mohamed Djellaoui, iwekked-d dakken tamsalt n ugemmay yettwasseqdacen i tirawt n tmaziɣt yessefk ad tettwazrew yernu ad d-yili fell-as uskasi deg tsuda tisdawanin d tussnanin ay yettwawekklen i waya yernu mebɛid ɣef lfetwat n uzniq. Ɣef leḥsab n uselmad-a, tirmitin tigraɣlanin d tid aydeg ay d-bnan tutlayt d tucrikt gar tentaliwin akk n tutlayt-nni.  

Gan timikt n tsusmi d tajmilt i wid yemmuten deg uɣelluy n usafag aserdasan tanezzayt n wass n laṛebɛa deg Bufarik, d tawaɣit aydeg mmuten 257 n yimdanen.

Last modified on Lexmis, 12 Yebrir 2018 15:14
Tiɣri i uḥraz n timmuzɣa seg usawem iɛiqqer d usseqdec asertan – Asarag
  Yeffeɣ-d ass n : Lexmis, 12 Yebrir 2018 15:08     Taggayt : LEZZAYER     Ɣran-t : 76 n tikkal   Bḍu