Ifuk unabaḍ assewjed n udatsenfar n usaḍuf agmanan n Tkadimit n Tutlayt Tamaziɣt

Yeffeɣ-d ass n : Laṛebɛa, 11 Yebrir 2018 17:18   Ɣran-t : 80 n tikkal
Ifuk unabaḍ assewjed n udatsenfar n usaḍuf agmanan n Tkadimit n Tutlayt Tamaziɣt

LEZZAYER TAMANEƔT – Ifuk unabaḍ assewjed n udatsenfar n usaḍuf agmanan yeqqnen ɣer Tkadimit Tadzayrit n Tutlayt Tamaziɣt, ɣef wakken ay d-yenna, ass n laṛebɛa, yiwen n ulɣu ay d-yeffɣen deg usmel n yimeẓla n uneɣlaf amenzu.

« Aḍris-a yessefra-d tuɣdaḍin, imukan ara yilin, assuddes d tiddit n Tkadimit-a ay d-yellan s usseḍru n umagrad wis 4 n tmenḍawt ay d-yesɣerten dakken ula d tamaziɣt d tutlayt taɣelnawt yernu d tunṣibt », ɣef wakken ay d-yenna uɣbalu-a.

« Agbur n udatsenfar-a n usaḍuf ad d-yettwasnuged deffir ma yessekyed-it useqqamu n yineɣlafen deg yimalasen ay d-yetteddun, sakkin ad t-id-qeddmen i umni uqbel ma ifuk uzgen amezwaru n useggas-a, akken ay yeɣtes uselway Abdelaziz Bouteflika », ɣef wakken ay d-yenna ulɣu-a.

Tettwassebded-d tegrawt n umahil tagraɣlift ɣer yimeẓla n uneɣlaf amenzu i ussewjed n udatsenfar-a.

Deg useqqamu n yineɣlafen n 14 Meɣres yezrin, yenced-d uselway n tegduda anabaḍ akken ad d-yesseɛjel aqeddem n usaḍuf-a i umni i lmend n ussebded n Tkadimit-a.

Takadimit Tazzayrit n Tutlayt Tamaziɣt ad tili ddaw leɛnaya n uselway n tegduda yernu ad tesseqdec imahilen n yimazzayen akken ad d-tessemlil tignatin iwatan i usmal n tmaziɣt d ussekmem n uẓayer-nnes n tutlayt taɣelnawt, tunṣibt ;

Deg useqqamu-nni n yineɣlafen n 14 Meɣres, daɣ, sɛeddan yiwen n usenfar n usaḍuf i ubeddel d ussmad n usaḍuf n Yulyu 1963 yerzan timeɣriwin tusḍifin i ureṣṣi usḍif n tmeɣra n Yennayer deg wumuɣ n tmeɣriwin tusḍifin n tmurt.

Aɣtas n ussidef n Yennayer deg wumuɣ n tmeɣriwin tusḍifin d azwur ur yesɛin tamtilt yeddem-it uɣella n uwanak yernu iswi-nnes d assejhed n tdukli d umtawa iɣelnawen.

« Akat-a, am wakk akaten niḍen ay yettwaddmen i lfayda n tmagit-nneɣ taɣelnawt s 3 n yisegran-nnes yellan d tinneslemt, tiɛɛuṛba d timmuzɣa, d ayen ara yesjehden tadukli d urkad aɣelnaw, deg wakud aydeg icqirrwen igensiyen d yimnaḍanen ggten yernu d wid umi yessefk ad naki », ɣef wakken ay d-iwekked uselway n tegduda.

Yenna daɣ uselway Bouteflika i unabaḍ « ur yettcuḥḥu i wacemma akken ad yesmatu asselmed d usseqdec n tmaziɣt s uqader n tebṛat d ṛṛuḥ n tmenḍawt ».

Ɣef leḥsab n yisefka n uɣlif n ussegmi aɣelnaw, asselmed n tmaziɣt iɛedda seg 11 n twilayin seg 2014 ɣer 38 n twilayin deg useggas aɣurbiz n 2017-2018, yernu yerna umḍan n yibalmuden ay izerrwen tamaziɣt armi ay yewweḍ ɣer 350.000 ddaw ussegrer n 2.757 n yiselmaden.

Azal n 300 n yiselmaden imernanen n tmaziɣt ara d-ssidfen i useggas aɣurbiz n 2018-2019, ɣef wakken ay d-yenna uɣlif ay d-yennan dakken iswi-nnes d asmatu n usselmed n tmaziɣt deg 48 n twilayin n tmurt.

Last modified on Laṛebɛa, 11 Yebrir 2018 17:45
Ifuk unabaḍ assewjed n udatsenfar n usaḍuf agmanan n Tkadimit n Tutlayt Tamaziɣt
  Yeffeɣ-d ass n : Laṛebɛa, 11 Yebrir 2018 17:18     Taggayt : LEZZAYER     Ɣran-t : 80 n tikkal   Bḍu