Assegmi: Ad temlil Massa Benghebrit d wenmalu n CNAPESTE ass n lḥedd i ukemmel n udiwenni

Yeffeɣ-d ass n : Lexmis, 01 Meɣres 2018 13:56   Ɣran-t : 21 n tikkal
Assegmi: Ad temlil Massa Benghebrit d wenmalu n CNAPESTE ass n lḥedd i ukemmel n udiwenni

LDZAYER TAMANEƔT – Tenna-d tneɣlaft n ussegmi aɣelnaw, Nouria Benghebrit, dakken ad temmager, ass n lḥedd, imaslaḍen n Useqqamu Aɣelnaw Afulman n Yixeddamen n Usselmed n Wegzum Akerḍan n Ussegmi (CNAPESTE) I wesduqqes n udiwenni d westag ɣef yissutren n yiselmaden, ɣef wakken ay d-yenna, ass n lexmis, usemtar n weɣlif n ussegmi, Mohamed Chaib Draa deg Ṛṛadyu Tis 3.  

Deg wayen yerzan tinqiḍin ayɣef ara d-yili wawal, yenna-d dakken taneɣlaft terra-d ɣef wakk ayen ay d-yessuter wenmalu-a yernu 90% seg yissutren-a yelha-d yes-sen weɣlif ladɣa deg wayen yerzan tiwilayin n Leblida d Bgayet anda ay d-yebda usunded.

I lmend n waya, yesmekti-d s weɣtas n weɣlif akken ad yazen ɣer snat-a n twilayin tismilin n yigensasen n weɣlif d wenmalu n CNAPESTE akken ad armen ad frun uguren yellan deg twilayin-a.

Yenna-d daɣ Mass Chaib Draa dakken ad d-yili wemyager niḍen gar weɣlif n wakk icriken inmettiyen ass n 7 Meɣres i udiwenni ɣef wanect ay yessefken ad t-id-iḥaz uselmad akken ad yettwasmel d aselmad agejdan.

I wesmekti, anmalu n CNAPESTE yeɣtes, deg tgara n tedwilt-nnes tafeɣnamit n wass n ttlata yezrin, ad ifak asunded-nnes war tilisa ay gan yiselmaden ass n 30 Yennayer yezrin.

Aɣlif n ussegmi aɣelnaw iweṣṣa akk inemhalen n ussegmi akken ad ssifessen tuqqla n wakk iselmaden imsundeden ɣer yiɣerbazen-nsen, ula d imsundeden ay yeccetkan deffir ma ttwastaxren.

Deg wayen yerzan iselmaden ay yettwastaxren yernu werɛad ur ccetkan, tettunefk lewṣaya i yinemhalen n yiɣerbazen akken ad asen-ssifessen ad ssersen iccetkiyen akken ad alsen ad ttwasnummden war leɛḍil. 

 

Assegmi: Ad temlil Massa Benghebrit d wenmalu n CNAPESTE ass n lḥedd i ukemmel n udiwenni
  Yeffeɣ-d ass n : Lexmis, 01 Meɣres 2018 13:56     Taggayt : LEZZAYER     Ɣran-t : 21 n tikkal   Bḍu